लगभग ११ वर्षको विश्राम पछि निर्देशक प्रकाश सायमी पुन नेपाली फिल्ममा फर्किने भएका छन् । उनले नयाँ फिल्म निर्देशन गर्ने भएका छन् । ११ वर्ष भन्दा अगाडि हतियार नामको फिल्म निर्देशन पछि यो क्षेत्रबाट हराएका सायमी नयाँ फिल्म 'दस्तुर' मार्फत पुन फिल्म क्षेत्रमा फर्किन लागेका हुन् ।
सायमीसंगै फिल्म क्षेत्रबाट हराएका नायक सिमान्त उदास पनि निमार्ताको रुपमा पुन: रि-इन्ट्रि गर्दैछन् । दस्तुरलाई सिमान्त र उनका दाई भिम उदास मिलेर निर्माण गर्न लागेका हुन् । फिल्म खेलाडीहरूको जीवन कथामा आधारित रहेर बनाउन लागेको निर्देशक सायमीले जानकारी दिए । पुषबाट छायाङकन सुरु गरिने भनिएको फिल्ममा संगित प्रविण बराईली र युजेन लामाको रहने पनि उनले बताए ।
पुराना निर्देशक सायमीले यो भन्दा अगाडि निर्देशन गरेका सात ओटा फिल्म मध्ये सिमाना बाहेक कुनै पनि चलेका थिएनन् । फिल्म नचले पनि उनकै फिल्मबाट डेब्यु गरेका जल शाह, झरना बज्राचार्य लगाएतका कलाकारहरु भने यो क्षेत्रमा राम्रैसंग चलेका थिए । फिल्मका कलाकार भने तय भई सकेका छैनन् । सम्भवत रङ्गमञ्चमा काम गरेका कलाकारलाई लिन सकिने र सबै नयाँ अनुहार हुने निर्देशक सायमीले बताए ।
हाल नेपालमा नयाँ-नयाँ प्रविधी र क्यामेरा प्रयोग गरि फिल्महरु बन्ने गरेको भए पनि सायमीले भने पुरानै १६ एमएमको क्यामेरा प्रयोग गर्ने भएका छन् । फिल्मको लागी ४५ लाखको लगानी छुट्याईएको बताईएको छ ।
