हरेकको मन मस्तिष्कमा बस्न सफल भएको सामाजिक संजाल फेसबुकलाई आधार मानेर निर्माण गरिएको फिल्म 'फेसबुक' कतारको दोहा सिनेमा हलमा लाग्ने भएको छ । महेन्द्र खड्काको आयोजनामा भविन्द्र तामाङले संयोजन गरेको फिल्मको शो यहि अक्टुबर १२ तारिखका दिन हुनेछ ।
११:३० र २:३० गरि दुई शो चलाउन लागिएको सो फिल्मलाई सुरज सुब्बा 'नाल्बो' ले निर्देशन गरेका हुन् । सुनिल कुमार थापाले निर्माण गरेको उक्त फिल्ममा राजेश हमाल, झरना थापा, स्वतन्त्र प्रताप शाह, सुवास थापा लगायतले अभिनय गरेका छन् । सामाजिक संजाल फेसबुकले समाजमा पारेको नकारात्मक प्रभावको साथमा मायाप्रेम अनि बेरोजगारी समस्यालाई चित्रण गरिएको फेसबुकले नेपालबाट भने राम्रो प्रतिक्रिया पाउन सकेन ।
नेपालबाट सोचे अनुरूपको व्यवसाय गर्न नसके पनि कतारमा रहेका नेपालीहरू भने यो फिल्म हेर्न आतुर रहेको कार्यक्रम व्यवस्थापक भानु शर्माले जानकारी गराए । उनले भने, 'अहिले देखि नै टिकट बुकिङ शुरू भईसकेको छ । फिल्म राम्रो चल्छ भन्नेमा हामी आशावादी छौं ।'
