यसअघि सार्वजनिक गरिएका पोस्टर, गीत तथा प्रोमोबाट राम्रो प्रतिक्रिया पाएको फिल्म भिसा गर्ल युनिटले पुन: नयाँ प्रोमो सार्वजनिक गरेको छ । ३१ सेकेन्डको उक्त सार्वजनिक प्रोमोलाई पनि दर्शकले रूचाउने निर्माण पक्षले बिश्वास लिएको छ ।
असोज १२ गते देशभर एकसाथ प्रदर्शनमा आउन लागेको सो फिल्मलाई प्रचण्डमान श्रेष्ठले निर्देशन गरेका हुन् । सिजी इन्टरटेन्मेण्टको व्यानरमा निर्माण गरिएको सामाजिक लाईट कमेडी उक्त फिल्ममा ऋचा शर्मा, बिनय श्रेष्ठ, कर्मा, रेमनदास श्रेष्ठ, रिमा विश्वकर्मा, सलोनी राजभण्डारी र मेनुका प्रधानको मुख्य अभिनय रहेको छ । कलाकारद्धय ऋचा र विनय सो फिल्मका सह-निर्माता पनि हुन् ।
फिल्मको कथा हालको काठमाडौं परिवेशमा बस्ने युवाहरुको सपना र आकांक्षाको वरिपरी घुमेको बताईएको छ जसको लेखन निर्देशक श्रेष्ठले नै गरेका हुन् । कालिप्रसाद बाँस्कोटा र कनैहा सिंहको संगीत रहेको सो फिल्मलाई शिबराम श्रेष्ठले खिचेका हुन् भने सम्पादन लोकेश बज्राचार्यको रहेको छ ।
