रिलिज मिती नजिकिंदै गर्दा निर्माता प्रदिप उदयले बुधबार बुटवलमा फिल्म ‘मालतीको भट्टी’ को बिशेष शो गराए । खासगरी फिल्मको पब्लिसिटीमा सहयोग पुगोस भन्ने उदस्यले पत्रकारहरुको लागि बिशेष शो गराइएको बुझिएको छ ।
बुधबार बिहान ९ बजे गरिएको बिशेष शोमा बुटवलका अधिकांस पत्रकारहरुको उपस्थिती थियो । साथै निर्माता उदयका आफन्तजन तथा साथीभाईहरुको पनि उपस्थिती थियो । फिल्म हेरिसकेपछि पत्रकारहरु तथा अन्य दर्शकले फिल्म राम्रो भएको प्रतिक्रिया दिंदै निर्माता उदयलाई सफलताको शुभकामना पनि दिए । अहिले सेक्सुअल फिल्महरुको वाढी आइरहेको अवस्थामा यस फिल्मले राम्रो व्यापार गर्ने अनुमान गरिएको छ ।
फिल्मको शिर्ष भुमिकामा भने नायिका रेखा थापाले अभिनय गरेकी छिन् । साथमा जीवन लुईटेल र नन्दिता केसीको पनि मुख्य भुमिका रहेको छ । रेखाले फिल्ममा एक भट्टीवाली युवतीको रुपमा अभिनय गरेकी छिन् । सामाजिक तथा पारिवारिक कथावस्तुमा आधारित यस फिल्ममा खासगरी हतारमा गरिने बिवाह र श्रीमान श्रीमतीले एक अर्कालाई बुझ्न नसक्दा उत्पन्न हुने समस्यालाई मुल रुपमा देखाइएको छ ।
यही असार २९ गतेबाट देशभर एकैसाथ प्रदर्शन हुन लागेको यस फिल्मले बिश्वभर प्रर्दशन गर्न पाउने गरी सेन्सरबोर्डवाट युनिभर्सल सर्टिफिकेट पनि पाएको छ । फिल्मको गणेशदेव पाण्डेले निर्देशन गरेका हुन् ।
