युवानिर्देशक दिवाकर भट्टराईले निर्देशन गरेको मल्टिस्टारर फिल्म 'मेरो जीवन साथी' को भदौ १५ का लागि रिलिज डेट फाईनल गरिएको छ । निर्देशक भट्टराईले फिल्मीखबरसँग कुरा गर्दै भदौ १५ उचित समय लागेको भन्दै रिलिज डेट फाईनल गरेको बताए ।
यसै फिल्मबाट निर्देशक बनेका भट्टराईले आफ्नो तर्फबाट उत्कृष्ट काम गरेको दाबी गर्दै दर्शकलाई मन पर्ने फिल्म बनाएको बताए । पहिलो फिल्ममा नै राजेश हमाल, रेखा थापा, रेश मरहठ्ठा, शुष्मा कार्की जस्ता मल्टिस्टारसँग काम गरेका दिवाकरले फिल्म पूर्ण रूपमा मनोरञ्जनात्मक रहेको बताए । रागिनी खड्गी, शिवन पोखरेल, संगीता क्षेत्री, सुपी थापा, बिष्णु सापकोटा लगायतले समेत अभिनय गरेको सो फिल्मलाई यमन म्युजिकले निर्माण गरेको हो ।
सुर्य कार्की निर्माता रहेको सो फिल्मलाई रामेश्वर कार्कीले खिचेका हुन् । फिल्ममा पछिल्लो समय चर्चामा रहेका अर्जुन पोखरेलले संगीत दिएका छन् भने हिमाल केसीको द्धन्दनिर्देशन तथा कविराज गहतराजको करियोग्राफी रहेको छ । फिल्मको कथा सामिप्य तिमल्सिनाले लेखेका हुन् ।
डिसिएन सर्भरबाट रिलिज हुने फिल्म मेरो जीवन साथीलाई काठमाण्डौमा मदनमान बज्राचार्यले वितरण गर्नेछन् भने पश्चिममा रामजी श्रेष्ठ र पूर्वमा बल्लु पराजुलीले वितरण गर्नेछन् ।
