केहि साता अगाडी जर्मनीको बर्लिनमा आयोजित बर्लिन फिल्म फेस्टिवलमा प्रिमियर गरिएको नेपाली फिल्म 'हाईवे' ले जुन १५ तारिखका लागि नेपाल रिलिज डेट घोषणा गरेको छ । नेपाली डेट असार १ गते रिलिजको घोषणा गरेको सो फिल्मलाई दिपक रौनियारले निर्देशन गरेका हुन् ।
राजमार्ग तथा समाजका विभिन्न पाँच क्षेत्रमा देखिएका समस्यालाई यथार्थ रूपले चित्रण गरिएको हाईवेलाई समिरमणी दीक्षितले निर्माण गरेका हुन् । सौगात मल्ल, कर्म, दयाहाङ राई, राजन खतिवडा, विनय श्रेष्ठ, आशा मगराती, सृष्टि घिमिरे तथा चर्तित बीबीसी नेपाली सेवाका पत्रकार रबिन्द्र मिश्र अभिनित हाईवेलाई अमेरिकाको लभेन्चर प्रोडक्सन र नेपालको आदी प्रोडक्सनले मिलेर निर्माण गरेको हो । केदार शर्मा, खगेन्द्र लामिछाने र दिपक रौनियारको कथा रहेको सो फिल्मका पटकथाकार अबिनाश बिक्रम शाह हुन् ।
