दुई बर्ष अघि बैबाहिक बन्धनमा बाधिएका गायक प्रमोद खरेललाई पुत्र लाभ भएको छ ।
आज बिहान साढे नौ बजे उनको श्रीमती दीपाले उनलाई पहिलो सन्तानको रूपमा छोरा उपहार स्वरूप दिएकी छिन् । चाबहिल स्थित ओम हस्पिटलमा छोरो उपहार पाएका गायक खरेलले फिल्मीखबरसंगको कुराकानीमा भने, 'बाबु बन्दा ज्यादै खुशी लागिरहेको छ । छोरो लामो कदको छ अनि अनुहार पनि मसंग मिलेको छ ।'
विडम्बना सांस्कृतिक कार्यक्रममा लागि आउदो १८ गते सम्मका लागि उनी भोली बेलुकी अष्ट्रेलिया उड्दैछन् जसकारण छोराको न्वारन गर्न उनी बन्चित हुने भएका छन् । उकेश दाहाल निर्देशित चलचित्र पलपलमाबाट फिल्ममा गायन सुरू गरेका खरेल पछिल्लो समय रूचाईएका गायकमा पर्दछन् । उनले करिब ७० वटा चलचित्रमा स्वर दिईसकेका छन् ।
पछिल्लो समय उनले प्रशन्न पौडेलको निर्देशनमा बनेको चलचित्र 'मेरो बेष्ट फ्रेण्ड' मा संगीत एवं स्वर दिएका छन् जुन चलचित्र रिलिजको तयारीमा छ । यस्तै बाबु गायक भएपछी छोरालाई के बनाउने इच्छा छ भन्ने फिल्मीखबरको प्रश्नमा प्रमोदले भने, 'उ ठूलो भएपछी जे बन्छु भन्छ त्यही गर्न तयार छु । मेरो कुनै हस्तक्षेप हुनेछैन । '
