गत शुक्रबार (१ फागुन)बाट प्रदर्शनमा आएको फिल्म ‘बिगुल’लाई निर्माताले हलबाट उतार्ने निर्णय गरेका छन् । मंगलबार निर्माता कम्पनी म्याग्नोलिया ग्रुपका अध्यक्ष सूर्यकान्त कोइरालाले जारी गरेको विज्ञप्तिमा भोलि बुधबारबाट फिल्मको प्रदर्शन रोक्ने निर्णय गरिएको जनाइएको छ । आसन्न प्रतिनिधि सभा निर्वाचनका कारण फिल्मको रिलिज स्थगित गरिएको विज्ञप्तिमा उल्लेख छ ।
‘फागुन ६ गते बुधबारदेखि अर्को सूचना जारी नभइन्जेलसम्मका लागि ‘बिगुल’को प्रदर्शन हाललाई स्थगित गरिएको जानकारी गराइन्छ । निर्वाचनको संवेदनशील अवस्थालाई ध्यानमा राखी सम्बन्धित निकायहरूको सुझाव तथा परिस्थितिको मूल्याङ्कन पश्चात् यो निर्णय लिइएको हो । हामी यस फिल्मको नयाँ प्रदर्शन मिति छिट्टै सार्वजनिक गर्नेछौं,’ विज्ञप्तिमा भनिएको छ ।
निर्माताले फिल्मको प्रदर्शन रोक्नुको कारण चुनावलाई देखाए पनि यो एउटा बहाना मात्र हो । पछिल्लो समय फिल्मले राम्रो व्यापार नगरेपछि विभिन्न कारण देखाएर प्रदर्शन स्थगित गर्ने ट्रेन्ड नै बनेको छ । ‘बिगुल’को हकमा पनि यही भएको हो । प्रदर्शनको ५ दिनसम्म फिल्मको व्यापारमा सुधारको संकेत समेत नदेखिएपछि निर्माताले प्रदर्शन स्थगित गरेका हुन् ।
रमेश कोइरालाको निर्देशनमा बनेको यस फिल्ममा नीर शाह, रमेश कोइराला, बेनिशा हमाल, नरेन खड्का, सरोज खनाल, हेमन्त बुढाथोकी, शिशिर वाङ्देल, मीरा पण्डित लगायतको अभिनय रहेको छ । कांग्रेस नेता दिनेश कोइराला निर्माता रहेको यस फिल्ममा प्रदीप भारद्वाज र मौनता श्रेष्ठको पटकथा तथा संवाद, शिव ढकालको छायांकन तथा तारा थापा (किम्भे)को सम्पादन छ ।
