अघिल्लो साता प्रदर्शनमा आएको फिल्म ‘आ बाट आमा’ हिट भएको निर्माताले दाबी गरेका छन् । शुक्रबार फिल्मको एक साताको कमाइ सार्वजनिक गर्दै निर्माण पक्षले फिल्मलाई हिट घोषणा गरेको हो । फिल्मका निर्माता तथा निर्देशक चन्द्र पन्तले फेसबुकमा सेअर गरेको एक पोस्टरमा फिल्मको एक साताको कमाइ ३ करोड १८ लाख रुपैयाँ ग्रस उल्लेख छ ।

पोस्टरमा ‘आ बाट आमा’लाई पहिलो साता उच्च कमाइ गर्ने पल शाहको पहिलो फिल्म समेत भनिएको छ । यदि निर्माताले सार्वजनिक गरेको आँकडा चलचित्र विकास बोर्डको बक्स अफिस तथ्यांककै आधारमा भए पनि यो पलको पहिलो साता सर्वाधिक कमाइ गर्ने पहिलो फिल्ममा भने पर्दैन । यसअघि उनी अभिनीत फिल्म ‘शत्रु गते’ले एक सातामा करिब ४ करोड कमाएको थियो ।

‘आ बाट आमा’लाई हिट घोषणा गर्न पनि निर्माताले हतार गरेको देखिन्छ । निकट स्रोतका अनुसार फिल्मको बजेट प्रचारसहित २ करोड हो । यसले हिटको ट्याग पाउन लगानी सुरक्षित गरेर कम्तीमा पनि २५–३० प्रतिशत नाफा कमाउनुपर्छ । यो भनेको साढे ६ करोड ग्रस कमाइ हो । यसअर्थ फिल्मलाई हिट हुन अझै ३ करोड रुपैयाँ ग्रस कमाउनुपर्छ ।  

यद्यपि, फिल्मको पहिलो हप्ताको रफ्तार हेर्दा व्यावसायिक सफलताको सम्भावना उच्च देखिएको छ । फिल्मले प्रदर्शनको पहिलो दिनदेखि नै देशभर दर्शकको राम्रो साथ पाइरहेको छ । ‘रुवाउने फिल्म’ भन्दै व्यापक प्रचार भइरहेकाले त्यसले हरेक उमेर समूहका दर्शकलाई हलसम्म तानेको छ । यसले गर्दा बक्स अफिसमा फिल्म लामो रेसको घोडा बन्न सक्ने देखिन्छ । 

आमा र छोराको भावनात्मक सम्बन्धको कथामा आधारित यस फिल्ममा विपना थापा, प्रदीप रावत (गजनी भिलेन), पल शाह, साइग्रेस पोखरेल, उषा उप्रेती, सिम्रन पन्त, रचना गौतम लगायतको अभिनय रहेको छ । फिल्ममा कृष्ण प्रसाद सुवेदी, ओमकार पन्त, प्रकाशजंग कुँवर,ध्रुव प्रसाद न्यौपाने र क्षितिज ढुंगाना निर्माताको रूपमा छन् ।