भारतीय गायक कैलाश खेरले नेपाली फिल्म ‘शिवांश’का लागि गीत गाएका छन् । महाशिवरात्रिको छेको पारेर फागुन १ गतेदेखि प्रदर्शनमा आउन लागेको यस फिल्मको ‘शिव ताण्डव’ बोलको गीतमा उनले स्वर दिएका हुन् । एक भिडियो सन्देशमार्फत उनले यसबारे जानकारी गराएका छन् । सम्भवतः उनले नेपाली फिल्मका लागि गाएको यो पहिलो गीत हो ।
ओजपूर्ण आवाजका लागि परिचित गायक खेरले भिडियो सन्देशमा ‘शिवांश’लाई भारत र नेपालको मैत्री सम्बन्धको प्रतीकको रूपमा चित्रण गरेका छन् । उनले भनेका छन्, ‘यसपटक केही विशेष छ । भारत-नेपाल मैत्री सम्बन्धको सौजन्यबाट हामीले एउटा अत्यन्तै प्यारो ‘ताण्डव स्तोत्रम्’ तयार पारेका छौं, जुन मैले गाउने अवसर पाएको छु ।’
कैलाशको स्वरमा गीत रेकर्ड भएसँगै निर्माण पक्षले बिहीबार फिल्मको एक आधिकारिक पोस्टर सार्वजनिक गरेको छ । पोस्टरमा फिल्मका मुख्य कलाकारहरू प्रवीण खतिवडा, तेज गिरी, रुषा न्यौपाने, विमला लिम्बू र विकाश जोशी तनावपूर्ण अवस्थामा देखिएका छन् । पोस्टरले धार्मिक र आध्यात्मिक विषयवस्तुमा फिल्म आधारित रहेको संकेत गर्छ ।
अञ्जान सिनेमा प्रोडक्सन हाउसको प्रस्तुति रहेको यस फिल्मका निर्देशक सन्तोष कुमार आत्रेय हुन् । अञ्जान केसी निर्माता रहेको फिल्ममा प्रदीप कुमार चौधरी, सबिर चुरौटे, उदय कुमार सुब्बा, टीका निरौला लगायतका कलाकारहरूको पनि अभिनय देख्न सकिनेछ । फिल्ममा सरद महतोको डीओपी, बारत लिम्बूको पटकथा तथा न्ह्यू बज्राचार्य र राजनराज सिवाकोटीको संगीत छ ।
