.jpeg)
प्रणय दिवसको छेको पारेर माघ २३ गतेबाट प्रदर्शन हुन लागेको फिल्म ‘कुमारी’को प्रचार अभियान तीव्र भइरहँदा यसको निर्माण पक्षले लाहुरेको सहरको रुपमा चिनिने धरानको एक भवनमा विशाल पोस्टर राखेको छ । धरानस्थित फ्रेन्ड्स सिनेमा हल रहेको भवनमा ३२०० स्क्वायर फिटको पोस्टर राखिएको हो । यसलाई नेपाली फिल्मकै सबैभन्दा ठूलो पोस्टर दाबी गरिएको छ ।
फिल्मको पोस्टरले ८ तल्ले भवनको सडकपट्टिको भाग पूरै छोपिएको छ । उक्त पोस्टरको छपाइमा मात्र ८० हजार रुपैयाँ खर्च भएको बताइएको छ । धरानको व्यस्त क्षेत्रमै राखिएको पोस्टरले फिल्मप्रति दर्शकको ध्यान तानिरहेको छ । धरानमा जस्तै देशका अन्य प्रमुख सहरमा पनि सोही किसिमको पोस्टर राखिने निर्माण पक्षले जनाएको छ ।
यतिबेला फिल्मको गीत ‘डोको बुन्ने’ चर्चामा छ । यो गीतमाथि एक लाखभन्दा बढी टिकटक भिडियो बनेका छन् भने युट्युबमा भ्यूज १८ लाख नाघिसकेको छ । यस गीतको चर्चाबीच माघ १ देखि फिल्मको प्रचारका लागि देशव्यापी कन्सर्ट गरिँदैछ । पाँचवटा सहरमा हुने कन्सर्टमा गायक केहर सिंह लिम्बू र उनको ब्यान्ड ‘केहर एन्ड द लुङा’ले प्रस्तुति दिने जनाइएको छ ।
दिनेश राउतको निर्देशनमा बनेको यस फिल्ममा अबिषेक खड्का, आकृति राजभण्डारी, घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सरोज लामिछाने, सकु शाह लगायतको अभिनय रहेको छ । महेन्द्र अधिकारी लगानीकर्ता रहेको फिल्ममा विकास सुवेदीको लेखन, सुप्रिम पराजुलीको सम्पादन तथा उत्तम न्यौपानेको साउन्ड डिजाइन छ ।
