धिराज राजवंशीको लेखन तथा निर्देशनमा फिल्म ‘हिमालयन गोल्ड’ बन्ने भएको छ । मंगलबार काठमाडौंको कमलादीस्थित गणेश मन्दिरमा शुभमुहूर्त गर्दै फिल्म निर्माणको घोषणा गरियो । आगामी नोभेम्बर (मंसिर)देखि छायांकन सुरू हुने यो फिल्म हिमाली क्षेत्रको कथामा बन्न लागेको हो ।
छायाँलय फिल्म्स र ह्वाइट एलिफन्ट मोशन पिक्चरको सहकार्यमा निर्माण हुने फिल्ममा कर्मा, सुनील थापा, मेनुका प्रधान, परिक्षा लिम्बू, साजन थापा मगर, अङ्कित खड्का, सुनील तामाङ, तेन्जिङ ठाकुरी, सबिता अधिकारी, ऋषिकेश बस्याल लगायतको अभिनय रहनेछ । फिल्मले जीवन संघर्ष, साहस र आशाको कथा प्रस्तुत गर्ने जनाइएको छ ।
सन् १९९२ को पृष्ठभूमिमा तयार हुने फिल्ममा गाउँकी एक युवतीले यार्सागुम्बा संकलनका लागि हिमाल चढ्ने क्रममा निर्दयी लुटेरा समूहसँग सामना गर्नुपरेको कथा समेटिएको निर्देशक राजवंशीले बताए । उनका अनुसार फिल्ममा हिमालय क्षेत्रलाई केवल दृश्यका लागि मात्र नभई एक जीवित पात्रका रूपमा चित्रण गरिनेछ ।
यो फिल्मलाई नेपाली मुलका भारतीय छायाँकार वशिष्ठ प्रधानले खिच्नेछन् । उनीसँग ‘कलंक’, ‘लस्ट स्टोरीज २’, ‘सस्पेक्ट’, ‘अद्भुत’ जस्ता फिल्ममा सहायक छायाँकारको रूपमा काम गरेको अनुभव छ । एक दर्जनभन्दा बढी भारतीय विज्ञापन र म्यूजिक भिडियो छायांकन गरिसकेका प्रधानले पहिलो पटक फिचर फिल्म खिच्न लागेका हुन् ।
