कुनै बेला दीपकराज गिरी, दीपाश्री निरौला, र जितु नेपालबीच व्यक्तिगत र व्यावसायिक दुवै हिसाबले बलियो सम्बन्ध थियो । उनीहरुले ‘६ एकान ६’ हुँदै ‘छ माया छपक्कै’सम्म निरन्तर सहकार्य गरे । तर, ‘महानायक’ विवादपछि उनीहरुको सहकार्य मात्र नभई व्यक्तिगत सम्बन्धमा पनि दरार देखा पर्यो । दीपक-दीपा र जितुबीच लामो समय पानी बाराबारकै अवस्था रहेको थियो ।
अब भने उनीहरुले विगतका तिक्तता भुलेर पुनः सहकार्यको यात्रा सुरु गरेका छन् । यसको सुरुवात ‘छक्का पञ्जा युएसए टूर’बाट भएको हो । ३ असोजमा अमेरिकाको बाल्टिमोरबाट सुरु हुने यो टूरमा दीपकराज र दीपाश्रीसहित जितु पनि सहभागी हुनेछन् । आइतबार काठमाडौंमा उक्त टूरबारे जानकारी दिन आयोजित कार्यक्रममा उनीहरुको उपस्थिति रहेको थियो ।
अमेरिकाको १५ स्थानमा हुने कार्यक्रममा दीपकराज, दीपाश्री र जितुसहित अभिनेता तथा उद्घोषक आसिफ शाह, गायिका मिना पोख्रेल र गायक धर्मेन्द्र सेवान पनि सहभागी हुनेछन् । आत्रेय प्रोडक्सन हाउस र ग्लोबल इभेन्ट्सको संयुक्त प्रस्तुतिमा हुन लागेको उक्त टूरमा हास्य प्रहसनदेखि सांगीतिक प्रस्तुतिसम्म रहने जनाइएको छ ।
१५ वर्षपछि अमेरिका जान लागेको दीपकले यसपटकको दशैंमा आफ्नो समूहको फिल्म रिलिज नभएकाले दर्शकलाई ‘छक्का पञ्जा’को मजा दिन अमेरिका टूरमा सहभागी हुन लागेको बताए । दीपाले भने धेरैपछि स्टेजमा प्रस्तुति दिन लागेकाले आफू नर्भस रहेको बताइन् । जितुले यसपालिको दशैं अमेरिकाबासी दर्शकसँग रमाइलो गर्दै मनाउन आफू उत्साहित रहेको बताए ।
