नेपालको दोस्रो ठूलो मल्टीप्लेक्स चेन आईएनआई सिनेमाजले काठमाडौंको जमलस्थित विश्वज्योति सिनेप्लेक्सको व्यवस्थापनको जिम्मा लिएको छ । योसँगै आईएनआईको हल संख्या ५ पुगेको छ । यो चेनले यसअघि काठमाडौं उपत्यकाभित्र दुई र उपत्यकाबाहिर बुटवल र सिमरामा गरी दुईवटा मल्टीप्लेक्स सञ्चालन गर्दै आएको छ ।
शुक्रबार विश्वज्योति सिनेप्लेक्सका सीइओ रोहनसिंह सराफ र आईएनआईका सीइओ गृहेन्द्र मुनकर्मीबीच सम्झौता पत्रमा हस्ताक्षर भएको हो । अब विश्वज्योति सिनेप्लेक्सलाई ‘आईएनआई सिनेमाज – विश्वज्योति’ नाममा ब्रान्डिङ गरिने जनाइएको छ । यसमा २९० दर्शक क्षमताको दुईवटा अडिटोरियम रहेका छन् ।
आईएनआई समूहले डिसेम्बर २०१९ मा आफ्नो पहिलो मल्टीप्लेक्सको रुपमा काठमाडौंको गोङ्गबुमा रहेको ल्होत्से मलबाट व्यावसायिक यात्रा सुरु गरेको थियो । देशभरका ५ वटा हलमा गरी १८६६ सिट क्षमता पुगेको आईएनआईको नयाँ बानेश्वरको एनबी सेन्टरमा रहेको हलमा नेपालकै पहिलो ‘जीडिसी डीटीएस एक्स’ अडियो सिस्टम जडान छ ।
