केही महिनाअघि निर्देशक झरना थापा र निर्माता सुनिल कुमार थापाले अभिनेता पल शाहसँग भेट गरेको एक तस्वीर बाहिरिएपछि फिल्म ‘ए मेरो हजुर ५’मा उनीहरूबीच सहकार्य हुन लागेको चर्चा चलेको थियो । तर, अब कथामा नयाँ ट्वीस्ट आएको छ । उक्त फिल्ममा पल नभइ अभिनेता अनमोल केसी भित्रिएका छन् । सोमबार साँझ निर्माता थापाले उनीसँग लिखित सम्झौता गरेका हुन् ।
अनमोल स्वयंले सामाजिक सञ्जालमा एक पोस्ट गर्दै फिल्ममा आफू अनुबन्धित भएको जनाएका छन् । उनले लेखेका छन्, ‘लामो समयको विश्राम पश्चात एउटा नयाँ अध्यायको सुरुवात गर्दैछु । ‘जेरी अन टप’, ‘बाटुलो जुन’ र ‘ए मेरो हजुर ५’मार्फत नेपाली फिल्म उद्योगमा नयाँ जोशका साथ हजुरहरूमाझ उपस्थित हुन लागेको यो खुसीको कुरा सुनाउन पाउँदा म निकै उत्साहित र हर्षित छु ।’
त्यस्तै, झरनाले फेसबुक पोस्टमार्फत फिल्ममा अनमोललाई स्वागत गरेकी छन् । ‘मेगास्टार अनमोल केसी भाईलाई ‘ए मेरो हजुर ५’मा स्वागत छ । ‘ए मेरो हजुर ३’ र ‘ए मेरो हजुर ४’पछि हामी तेश्रो पटक सहकार्य गर्दैछौं । यो सहकार्यले भविष्यमा पनि निरन्तरता पाउने विश्वास व्यक्त गर्दै ‘ए मेरो हजुर ५’लाई उत्कृष्ट बनाउन कुनै प्रयास बाँकी नराख्ने प्रण गर्दछौं,’ उनले लेखेकी छन् ।
आगामी असोजबाट छायांकन सुरू गर्न लागिएको यो फिल्ममा अनमोलको जोडी अभिनेत्री सुहाना थापासँग बाँधिनेछ । यसअघि उनीहरूले ‘ए मेरो हजुर’को तेस्रो र चौथो श्रृंखलामा सहकार्य गरिसकेका छन् । एकपटक फेरि यो जोडीलाई पर्दामा हेर्न दर्शकहरू उत्साहित देखिएका छन् । ‘ए मेरो हजुर ५’भन्दा अघि अनमोलले ‘बाटुलो जुन’ र सुहानाले ‘परालको आगो’को छायांकन सक्नेछन् ।
