हिमाल आरोहणकी सौखिन अभिनेत्री दीया पुनले विश्वकै अग्लो शिखर सगरमाथा चढेको दुई वर्षपछि रुस र युरोपको सबैभन्दा अग्लो हिमाल माउन्ट एल्ब्रसको पनि सफलतापूर्वक आरोहण गरेकी छन् । उनी नेपाली समयअनुसार मंगलबार बिहान ११ बजे समुन्द्री सतहदेखि ५,६४२ मिटरको उचाइमा रहेको उक्त हिमालको चुचुरोमा पुगेकी हुन् । त्यहाँ उनले नेपालको झन्डा फहराइन् ।
सगरमाथा र एल्ब्रसभन्दा अघि दीयाले अफ्रिका महादेशको सबैभन्दा अग्लो हिमाल किलिमन्जरो (५,८९५ मिटर), दक्षिण अमेरिका महादेशको अकोनकागा हिमाल (६,९६१ मिटर) र नेपालकै मनास्लु हिमाल (८,१६३ मिटर) आरोहण गरिसकेकी छन् । अब उनी उत्तर अमेरिकाको डिनाली, अन्टार्कटिकाको भिन्सोन मासिफ र इण्डोनेसियाको पुंकाक जय हिमाल आरोहण गर्ने तयारीमा छिन् ।
बेलायतमा बस्दै आएकी दीया पेशाले नर्स समेत हुन् । उनले जागिरको कमाइ र फिल्मबाट पाउने पारिश्रमिक बचत गरेर हिमाल आरोहण गर्दै आइरहेकी छन् । ‘वीर विक्रम’बाट अभिनेत्रीको रुपमा डेब्यु गरेकी उनले ‘मिस्टर झोले’, ‘दयारानी’, ‘अन्तिम संस्कार’ जस्ता फिल्ममा काम गरिसकेकी छन् । दीयाको नयाँ फिल्म ‘एक्लो’ प्रदर्शन हुन बाँकी छ । यसमा उनी अन्तरीक्षयात्री बनेकी छन् ।
