दीपेन्द्र के. खनाल निर्देशित फिल्म ‘के घर के डेरा : घर नं २’ ले दर्शकबाट राम्रो प्रतिक्रिया पाएको छ । गत शुक्रबारदेखि प्रदर्शनमा आएको फिल्ममा दर्शक अकुपेन्सी पनि सुखद् छ । रिलिजको पहिलो र दोस्रो दिन देशभरका हलमा फिल्म सुखद् अकुपेन्सीमा प्रदर्शन भएको थियो । आइतबार पनि कतिपय हलमा फिल्मले राम्रो व्यापार गरेको निर्माण पक्षले जनाएको छ । वर्ड अफ माउथ बलियो भएकाले आउँदा दिनमा व्यापारमा बढोत्तरी हुने विश्वास निर्माण टिमको छ । निर्देशक खनालले फिल्मको विषय र कलाकारको काम दर्शकले मन पराएको बताए ।
उनले भने, ‘कलाकारको काम र विषयको दर्शकले खुलेर तारिफ गर्नुभएको छ। सामाजिक कथावस्तुमा दर्शकको गहिरो रूचि छ भन्ने यसले पुष्टि गर्छ ।’
दर्शकबाट प्राप्त प्रतिक्रियालाई लिएर कलाकार पनि उत्साहित छन् । फिल्मको मुख्य पात्रमध्येका एक खगेन्द्र लामिछानेले भने, ‘दर्शकले पशुपतिप्रसाद पछिकै सबैभन्दा राम्रो काम यो फिल्ममा देखियो भन्नुभएको छ । दोस्रो दिनबाटै आएको यो साथ र प्रेम हाम्रो टिमका लागि खुसीको कुरा हो ।’
फिल्मले उत्कृष्ट वर्ड अफ माउथ पाउँदै जाँदा त्यसको प्रभाव हलमा देखिएको निर्देशक खनालको भनाईं छ ।
‘के घर के डेरा : घर नं २’ को कथा साहित्यकार बुद्धिसागरले लेखेका छन् । फिल्ममा खगेन्द्र लामिछाने, निश्चल बस्नेत, आर्यन सिग्देल, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रूविना घिमिरे, सुरज विष्टलगायत कलाकारको अभिनय छ ।
एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रिएसनको प्रस्तुतिमा फिल्म बनेको हो । फिल्मको निर्माता नकिम उद्दिन, शरद श्रेष्ठ र किरण महर्जन हुन् भने कार्यकारी निर्माताको रूपमा युवराज कार्की छन् ।
