बलिउडमा अभिनेता र अभिनेत्रीको पारिश्रमिकमा ठूलो विभेद देखिन्छ । एउटा चल्तीको अभिनेताले सय करोड पारिश्रमिक बुझ्दा अभिनेत्रीले १० करोड पनि पाउँदैनन् । यद्यपि, केही अभिनेत्रीहरुको पारिश्रमिकमा वृद्धि भैरहेको छ । एउटा फिल्मबापत ४ देखि ८ करोडसम्म पारिश्रमिक लिने गरेकी अभिनेत्री कियारा आडवाणीले नयाँ फिल्म ‘डन ३’मा करिअरकै उच्च पारिश्रमिक पाएकी छन् ।
‘कबीर सिंह’, ‘गुड न्यूज’, ‘भूल भुलैयाँ २’ जस्ता फिल्मको सफलतापछि कियाराको बढ्दो मागलाई मध्यनजर गर्दै ‘डन ३’मा उनलाई १३ करोड पारिश्रमिक दिइएको बलिउड हंगामाले दाबी गरेको छ । उनले आफ्नो करिअरमा पाएको यो सर्वाधिक पारिश्रमिक हो । फिल्ममा उनको जोडी अभिनेता रणवीर सिंहसँग बाँधिँदैछ । अभिनेता समेत रहेका फरहान अख्तरले फिल्मको निर्देशन गर्नेछन् ।
फिल्मका लागि निर्देशक अख्तरले कियारासँगै कृति सेननको नाम ‘सर्टलिस्ट’ गरेका थिए । त्यसमध्ये रणवीरले कियारालाई चुनेका हुन् । ‘डन’को अघिल्ला दुई श्रृंखलामा अभिनेता शाहरुख खान र अभिनेत्री प्रियंका चोपडाले जोडी भएर काम गरेका थिए । र, दुवै श्रृंखला सफल भएका थिए । ‘डन ३’मा अभिनेता इमरान हाशमी भिलेनको भूमिकामा देखिन लागेको भारतीय मिडियामा चर्चा छ ।
