बलिउड सुपरस्टार सनी देओल अभिनीत फिल्म ‘गदर २’ले भारतीय बक्स अफिसमा पाँच सय करोडको रेकर्ड बनाउन सफल हुँदा उनका कान्छा छोरा राजवीर देओल बलिउड डेब्यूका लागि तम्तयार अवस्थामा छन् । सनीका जेठा छोरा करण देओलले भने सन् २०१९ मा फिल्म ‘पल पल दिल के पास’बाट अभिनय करिअरको सुरुवात गरेका थिए । तर, उनको पहिलो फिल्म नै फ्लप भयो ।
राजवीरको पहिलो फिल्म ‘दोनो’को सोमबार ट्रेलर सार्वजनिक भएको छ । फिल्ममा उनको जोडी पलोमा थकेरियासँग बाँधिएको छ । पलोमाको पनि यो डेब्यू फिल्म हो । उनी बलिउडकी चर्चित अभिनेत्री पूनम ढिल्लोकी छोरी हुन् । ट्रेलरमा राजवीर र पलोमाको रोमान्टिक केमेस्ट्रीलाई देखाइएको छ । तर, राजवीरको अभिनय अत्यन्त कमजोर देखिन्छ । यद्यपि, उनी चार्मिङ देखिएका छन् ।
राजश्री प्रोडक्सनको ब्यानरमा निर्माण भएको फिल्मलाई ‘हम आपके हैं कौन...!’ फेम्ड निर्देशक सूरज बडजात्याका छोरा अवनीश एस बडजात्याले निर्देशन गरेका हुन् । उनको पनि यो पहिलो निर्देशकीय फिल्म हो । यसअघि राजश्री प्रोडक्सनको प्रायः फिल्ममा असिस्टेन्ट डाइरेक्टरको रुपमा काम गरेको अनुभव उनीसँग छ । अक्टोबर ५ देखि फिल्म प्रदर्शनमा आउने तयारीमा रहेको छ ।
मुम्बईमा आयोजित ‘दोनो’को ट्रेलर सार्वजनिक कार्यक्रममा अभिनेता सनी देओलले आफूले फिल्म हेरिसकेको र राम्रो बनेको दाबी गरे । उनले भनेका छन्, ‘मैले यो फिल्म हेरिसकेको छु । यो आधुनिक समयको लभस्टोरी हो । ‘सोचा ना था’ फिल्म जस्तै लाग्नेछ । सायद त्योभन्दा पनि राम्रो ।’ राजश्रीले आगामी वर्ष सलमान खान र कृति सेननलाई लिएर फिल्म ‘प्रेम की शादी’को निर्माण गर्दैछ ।
