२०७८ सालको चैतमा सिक्किमको गान्तोकमा फिल्म ‘ग्रहण’ निर्माणको घोषणा गरिएको थियो । फिल्मको मुख्य भूमिकामा नम्रता श्रेष्ठ, सारुक ताम्राकार र विनय श्रेष्ठले अभिनय गर्दै थिए । तर, पछि फिल्मबाट विनय बाहिरिए । नाम पनि हेरफेर गरेर ‘ह्यासट्याग माया’ राखियो । विनयको ठाउँमा निर्माण टिमले रोयदीप श्रेष्ठलाई अनुबन्ध गर्दै गत जेठ २० गतेबाट छायांकन सुरु गरिएको थियो ।
स्क्रिप्ट लेखनको चरणदेखि ४५ प्रतिशत छायांकन सकिँदासम्म ५ करोड खर्च भैसकेको निर्माण पक्षको दाबी छ । लागत बढेता पनि छायांकन पूरा गरेरै छाड्ने अठोटमा निर्माता थिए । तर, असार २१ गते फिल्मका मुख्य अभिनेता सारुक ताम्राकारले आत्महत्या गरेपछि फिल्मको निर्माण नै अन्योल बनेको छ । अब फिल्म बनाउँदा सुरुबाटै छायांकन गर्नुपर्ने हुन्छ, जसले लागत थप बढ्नेछ ।
सारुकले आत्महत्या गरेपछि फिल्मका निर्देशक राजीव गुरुङले एक अन्तर्वार्तामा छायांकन सेटको एक घटनासँगै फिल्मकी मुख्य अभिनेत्रीको बारेमा केही तथ्य सार्वजनिक गरेपछि अब फिल्मको काम अगाडि बढाउन सहज देखिन्न । यसैले निर्माता/निर्देशक फिल्मको निर्माण रोक्ने मनस्थितिमा पुगिसकेको निकट स्रोत बताउँछ । यद्यपि, अहिलेसम्म यसबारेमा कुनै निर्णय लिइएको छैन ।
फिल्मको निर्माणबारे हालै एक अन्तर्वार्तामा निर्देशक गुरुङले भनेका थिए, ‘सारुक भाईको निधनले हामी स्तब्ध छौं । अहिले हामी उसले किन आत्महत्या गर्न बाध्य भयो भन्नेबारेमा जान्न खोजिरहेका छौं । यो अवस्थामा हामीले अब के गर्ने भनेर सोच्न सकेका छैनौं । केही दिनमा हामी के गर्ने भनेर निर्णय लिनेछौं ।’ उनले सारुकको निधनपछि नम्रता श्रेष्ठ सम्पर्कमा नरहेको समेत बताएका थिए ।
निर्माताले फिल्मका कलाकारहरुलाई पूर्वतयारीका लागि डेढ लाख मासिक भाडा तिरेर आरोही निर्मल पूर्जाको बुढानिलकण्ठस्थित घरमा राखेको थियो । फिल्ममा नम्रताको एरियल योगा टिचरको भूमिका रहेकाले उनलाई योगा सिकाउनका लागि दिनमा ५ हजार पारिश्रमिक तिरेर योगा टिचर समेत उपलब्ध गराइएको थियो । सारुकको निधनपछि निर्मलको घर प्रहरीले सिल गरिसकेको छ ।
