‘कुछ कुछ होता है’, ‘कभी खुशी कभी गम’, ‘माई नेम इज खान’ जस्ता यादगार फिल्मका निर्देशक करण जोहरले करिब ६ वर्षपछि निर्देशनमा कमब्याक गरेको फिल्म ‘रकी और रानीकी प्रेम कहानी’को ट्रेलर सार्वजनिक भएको छ । ट्रेलरमा ड्रामा र रोमान्सलाई देखाइएको छ । रणवीर सिंह र आलिया भट्टबीचको प्रेममा आउने उतारचढावमा केन्द्रित ट्रेलरले बलियो दृश्यभाषाको संकेत गर्छ ।
रकी र रानी फरक पारिवारिक पृष्ठभूमिका छन् । पहिलो भेटबाटै उनीहरुबीच प्रेम अंकुराउँछ । विवाह गर्नुभन्दा अगाडि उनीहरुले एकअर्काको परिवारसँग ३ महिना समय विताउने निर्णय गर्छन् । एकअर्काको परिवारसँग मिलेर बस्न सकेको खण्डमा मात्र विवाह गर्ने उनीहरुबीच सर्त हुन्छ । के दुवै एकअर्काको परिवारसँग बस्न सक्छन् ? उनीहरुको बिहे हुन्छ ? ट्रेलरले यसैको जवाफ दिन्छ ।
फिल्ममा रणवीर र आलियाका साथै धर्मेन्द्र, जया बच्चन, शबाना आजमी, रोनित रोय, तोता रोय चौधरी जस्ता कलाकारहरुको पनि अभिनय छ । इशिता मोइत्रा, शशांक खेतान र सुमित रोयले मिलेर लेखेको फिल्म २८ जुलाईदेखि प्रदर्शन हुँदैछ । रोमान्टिक तथा पारिवारिक फिल्म बनाउन सिपालु मानिने करण जोहरले विशाल क्यानभासमा ‘रकी और रानीकी प्रेम कहानी’ तयार पारेका छन् ।
