नवल खड्काद्वारा निर्देशित, निर्मित तथा अभिनीत फिल्म ‘काँडेतार’ यस वर्षको महाशिवरात्रीको दिनबाट प्रदर्शनमा आउने भएको छ । अभिनेता खड्काले आइतबार आफ्नो जन्मदिनको अवसर पारेर एक पोस्टरमार्फत् आगामी फागुन २५ गतेलाई फिल्मको प्रदर्शन मिति घोषणा गरेका हुन् । २५ गते शिवरात्रीको सार्वजनिक विदा र शुक्रबार पनि परेकाले नवलले उक्त मिति रोजेका हुन् ।

गत बैशाखमा चलचित्र जाँच समिति (सेन्सर बोर्ड)ले फिल्मको केही दृश्य र संवादमा आपत्ति जनाउँदै प्रदर्शनका लागि जाँचपासको प्रमाणपत्र दिएको थिएन । यो विषयलाई केही दिन मिडियामा उछालेका नवलले आपत्तिजनक संवाद र दृश्य हटाएपछि सेन्सर बोर्डले प्रमाणपत्र दिएको थियो । फिल्मले नेपाल-भारत सीमामा काँडेतार लगाउनुपर्ने मुद्धा उठाएको निर्देशक खड्का बताउँछन् ।

फिल्ममा नवलसँगै गौरव पहारी, रेविका गुरुङ, सुरविना कार्की, मुरलीधर, प्रेम सुब्बा, परशुराम चौधरी, सञ्जय खतिवडा, राजेन्द्र भगत, पन्नालाल सिकदार, प्रकाश गिरी, बाल कलाकारहरु नादिया खड्का, सनया खड्कालगायतको पनि अभिनय छ । फिल्ममा श्री श्रेष्ठको द्वन्द्व निर्देशन र कविराज गहतराजको कोरियोग्राफी रहेको छ । फिल्मको टिजर र एक गीत भने रिलिज भैसकेको छ ।

नवलसँगै माकिको राई र अञ्जु केसी निर्माता र सत्यकला राई कार्यकारी निर्माता रहेको ‘काँडेतार’मा मणि थापा र दीपक शर्माको संगीत, सौरभ लामाको छायांकन, तारा थापा ‘किम्भे’ र बन्दे प्रसादको सम्पादन छ । फिल्मलाई राज्यद्वारा आर्थिक अनुदान, करमा छुट, स्वदेशमा सोलो प्रदर्शन र विदेशमा प्रदर्शन गर्न कुटनैतिक पहल गरिदिन निर्देशक नवलले सरकारसँग आग्रह गरेका छन् ।