आगामी भदौ ८ गतेबाट प्रदर्शनमा आउन लागेको फिल्म ‘जय हो’को फर्स्टलुक पोस्टर सार्वजनिक गरिएको छ । सार्वजनिक दुईटा पोस्टरमा फिल्मका मुख्य कलाकारहरु माओत्से गुरुङ, अर्पण थापा, निशा अधिकारी, केकी अधिकारी र सलोन बस्नेत ‘क्यारेक्टर लुक्स’मा प्रस्तुत छन् । एउटामा उनीहरु विभिन्न भावभंगीमा देखिएका छन् भने अर्कोमा वाण हान्न तम्तयार अवस्थामा चित्रित छन् ।
सलोन-सलिना फिल्मस्को ब्यानरमा निर्माण भएको फिल्मका निर्देशक टेक पौखरी राई हुन् । गत वर्ष उनी निर्देशित फिल्म ‘मिलन’ प्रदर्शनमा आएको थियो । फिल्मका प्रस्तुतकर्ता शोभित बस्नेत हुन् । फिल्मको निर्मातामा अष्ट्रेलियाका व्यवसायी राज के अधिकारी र सुरज सरकार रहेका छन् । नेपालको हिमाली क्षेत्रको कथालाई फिल्मले प्रस्तुत गरेको हुनसक्ने सार्वजनिक पोस्टरबाट बुझिन्छ ।
फिल्ममा सुरेश न्यौपानेको पटकथा लेखन, सौरभ लामाको डीओपी, शम्भुजित बाँस्कोटा र सागर आलेको संगीत, बनिश शाहको सम्पादन, सम्राट बस्नेतको द्वन्द्व निर्देशन, कविराज गहतराज र रामजी लामिछानेको कोरियोग्राफी, समीर मियाँको भीएफएक्स छ । त्यस्तै, फिल्मको प्रोडक्सन हेड सुभाष काफ्ले, प्रोडक्सन म्यानेजर केवलमान सिंह बस्नेत र प्रोडक्सन डिजाइनर समीर खान हुन् ।
