‘लभ लभ लभ’ फेम्ड अभिनेता सुरज पाण्डेको डेब्यू निर्देशित फिल्म ‘परस्त्री’को पहिलो गीत सार्वजनिक गरिएको छ । ‘माया बस्यो तिमीसँग’ बोलको रोमान्टिक गीतमा फिल्मका मुख्य अभिनेता गौरव विष्ट र अभिनेत्री शिल्पा मास्के फिचर्ड छन् । गीतले यी दुईको प्रेमभाव बोल्छ । केके ब्रदर्स (कोशिश र केतन)को शब्द रचना तथा संगीत रहेको गीतमा केतन क्षेत्री र निखिता थापाको स्वर छ ।
वाइल्ड रिपर्ज ग्रुपको कोरियोग्राफी रहेको गीतमा शिल्पा बोल्ड अवतारमा प्रस्तुत छिन् । उनले लगाएका पहिरनहरु आकर्षक छन् । सार्वजनिक गीतमा गौरवसँग उनको केमेस्ट्री सुहाएको छ । केही हप्ताअघि निर्माण टिमले सार्वजनिक गरेको चारवटामध्ये एउटा पोस्टरमा उनी बाथटपमा ‘न्यूड’ अवतारमा देखिएकी थिइन् । त्यसले शिल्पाको भूमिकाप्रति दर्शकमा कौतुहलता जागृत गरेको छ ।
हिन्दी डबसहित भारतका हलमा समेत प्रदर्शन गर्न लागिएको ‘परस्त्री’मा कोशिश क्षेत्री, एलिसा क्षेत्री, अशान्त शर्मा, रामबाबु रेग्मी, गीत विष्ट, सरस्वती अधिकारी, अर्पित न्यौपानेलगायतको पनि अभिनय रहेको छ । शर्मिला पाण्डे निर्माता रहेको फिल्मको अहिले भारतको एक स्टुडियोमा हिन्दी डबको काम भैरहेको छ । जसका लागि शर्मिला र सुरज (आमा-छोरा) यतिबेला भारतमा छन् ।
डिएस डिजिटलको ब्यानरमा निर्माण भएको फिल्मको कथा ‘आमा’ फेम्ड निर्देशक दीपेन्द्र के. खनालले लेखेका हुन् । यसले गर्दा पनि फिल्मप्रति अपेक्षा उच्च छ । फिल्मका डीओपी निरज पाण्डे हुन् । थ्रिलर जनरामा निर्माण भएको फिल्मले विवाहेत्तर सम्बन्धले निम्त्याउने पारिवारिक र सामाजिक संकटको कथालाई उठान गरेको छ । आगामी असार १५ गतेबाट फिल्म प्रदर्शनमा आउनेछ ।
