संसारकै सबैभन्दा ठूलो फेसन महाकुम्भ ‘मेट गाला’मा बलिउड अभिनेत्री आलिया भट्ट विश्व प्रख्यात नेपाली फेसन डिजानर प्रबल गुरुङले डिजाइन गरेको पहिरनमा सहभागी भएकी छन् । सोमबार भएको समारोहमा उनले सेतो रंगको गाउन पहिरिएकी थिइन्, जसमा उनको सुन्दरता थप खुलेको थियो । मेट गालामा उनको डेब्यू हो । आलियाको पहिरन १ लाख बढी मोतीबाट बनेको हो ।
आलियाका लागि प्रबलले भारतमै पहिरन तयार पारेका हुन् । अमेरिकामा बस्ने गरेका उनी अघिल्लो महिना केही दिन नेपाल बसेर भारत पुगेका थिए । त्यही मौकामा उनले मेट गालाका लागि आलियालाई पहिरन डिजाइन गरेका हुन् । आलियाले इन्स्टाग्राममा आफूले लगाएको पहिरनलाई प्रबलले प्रेमपूर्वक बनाएको श्रम भनेकी छन् । दुवै एकसाथ उक्त समारोहमा उपस्थित भएका थिए ।
प्रबलको पहिरनमा अमेरिकी मोडल अनोक याइ, अमेरिकी अभिनेत्री केल्सी असबिल चो, अमेरिकी लेखक, निर्माता तथा अभिनेत्री क्विन्टा ब्रन्सन, न्यूजील्याण्ड फिल्म निर्माता तथा अभिनेता टाइका वाइटीटी र बेलायती गायिका तथा गीतकार रिटा ओरा पनि मेट गालामा सहभागी भएका थिए । यसअघि पनि मेट गालाका लागि प्रबलले विश्व प्रख्यात सेलिब्रेटीलाई पहिरन डिजाइन गरेका छन् ।
सन् २०१७ मा बलिउड अभिनेत्री दीपिका पादुकोणले पनि प्रबलकै डिजाइन लगाएर मेट गालामा डेब्यु गरेकी थिइन् । बलिउडका अन्य अभिनेत्रीहरु करिना कपुर, कियारा आडवाणी, प्रियंका चोपडा, ऐश्वर्या राय, कट्रिना कैफ, सारा अली खान, श्रद्धा कपुर, राधिका मर्चेन्टलगायतले पनि उनको डिजाइन लगाएका छन् । डिजाइनर गुरुङ सिंगापुरमा जन्मिएर काठमाडौंमा हुर्किएका हुन् ।
