आगामी जेठ ५ गतेबाट प्रदर्शनमा आउन लागेको फिल्म ‘ए साथी सुन’को ‘मनले भन्छ’ बोलको गीत सोमबार युट्युबमा सार्वजनिक गरिएको छ । गीतमा हर्क साउदको शब्द रचना तथा उज्वल सागरको संगीत र स्वर रहेको छ । लिरिकल गीतमा फिल्मका मुख्य अभिनेता रमेश बानियाँ र अभिनेत्री वर्षा सिवाकोटी प्रस्तुत छन् । उनीहरुको प्रेम र वियोगको दुईवटा पाटो गीतमा देखाइएको छ ।

लभस्टोरी, थ्रीलर र कमेडी जनरामा बनेको फिल्ममा वर्षा र रमेशका साथै आयन खड्का, सुशिल पोखरेल, जयनन्द लामा, रमेश अधिकारी, बिमला गिरीलगायतको पनि अभिनय छ । फिल्ममा कृष्मा खड्का र इभान सन्जेलले बाल कलाकारको रुपमा अभिनय गरेका छन् । ‘ए साथी सुन’ स्व. जयनन्द लामाको अन्तिम फिल्म समेत हो । २०७८ सालको फागुनमा उनको निधन भएको थियो ।

राम राघव आचार्यको लेखन तथा निर्देशन रहेको फिल्मलाई बीना कार्की र सन्तोषकुमार राईले मिलेर निर्माण गरेका हुन् । इभान इन्टरटेनमेन्टको प्रस्तुतिमा निर्माण भएको फिल्मको सह-निर्मातामा सुदीप पौडेल छन् । फिल्मलाई आरआर फिल्म्सले वितरण गर्ने अधिकार लिएको छ । वर्षालाई ‘ए साथी सुन’प्रति ठूलो आशा छ । यसमा उनको भूमिका बलियो रहेको निर्माण टिमको दाबी छ ।