बक्सअफिसका हिट मेशिन मानिने अभिनेता सलमान खानको चार वर्षपछि हलमा रिलिज भएको फिल्म हो, ‘किसी का भाई किसी की जान’ । यसैले फिल्मले बक्सअफिसमा आक्रामक ओपनिङ गर्ने प्रक्षेपण गरिएको थियो । तर, फिल्मको ओपनिङ नै अपेक्षाकृत हुन सकेन । पहिलो दिन फिल्मले १५ करोड ८१ लाख मात्र जोड्यो, जुन सलमानको स्टारडमको तुलनामा कमजोर मानिएको छ ।
यो फिल्मलाई दर्शक तथा समीक्षकले सलमानको करिअरकै झूर फिल्मको संज्ञा दिएका छन् । कुनै पनि फिल्मले खराब प्रतिक्रिया पाएपछि दोस्रो दिनबाट कलेक्सन घट्न थाल्छ । तर, सलमानको फिल्मले दोस्रो दिनबाट कमाईमा उछाल ल्याएको छ । फिल्मले दुई दिनमा ५० करोड बढी कमाई गरेको छ । दोस्रो दिन फिल्मले २५ करोड ७५ लाख र तेस्रो दिन २६ करोड ६१ लाख कमायो ।
तीन दिनमा ६८ करोड १७ लाख कमाएको फिल्मले पहिलो हप्ताभित्र सय करोडको आँकडा नघाउन सक्ने विश्लेषण गरिएको छ । फिल्मले लगानी उठाउने सम्भावना भने ज्यादै न्यून छ । १ सय ५० करोडको लागतमा निर्माण भएको फिल्म १ सय ५/१० करोडमा समेटिन सक्नेछ । किनकि, फिल्मको ‘वर्ड अफ माउथ’ शक्तिशाली छैन । सलमानका एकपछि अर्को फिल्म फ्लप भैरहेका छन् ।
फिल्मलाई फरहाद समजीले निर्देशन गरेका हुन् । सलमा खान निर्माता रहेको फिल्ममा सलमानसँगै पूजा हेगडे, वेङ्कटेश दग्गुबाती, जगपति बाबू, विजेन्द्र सिंह, सिद्धार्थ निगम, शहनाज गिल, जगपति बाबू, जस्सी गिल, पलक तिवारीलगायतको पनि अभिनय छ । फिल्मको एक गीतमा साउथ सुपरस्टार राम चरणले नृत्य गरेका छन् । फिल्मको कथादेखि सलमानको अभिनयसम्म कमजोर छ ।
