आइतबार उच्च अदालत कास्कीले पल शाहविरुद्ध जबर्जस्ती करणीको अभियोगमा दाबी नपुगेको भन्दै सफाइ दिएपछि सोमबार विहान ११ बजे सम्पूर्ण कानुनी प्रक्रिया पूरा गरेर उनी दमौलीको तनहुँ कारागारबाट रिहा भएका छन् । उनको स्वागतमा बहिनी र नजिकका साथीभाई कारागार पुगेका थिए भने कारागारबाहिर पलको रिहाइको खुसीमा प्रशंसकहरुको ठूलो भीड लागेको थियो ।

रिहा भएपछि पलले सञ्चारकर्मीसँग छोटो कुराकानी गर्दै ‘सबैलाई धन्यवाद’ भनेका छन् । उनी साढे १२ बजे बहिनी र साथीभाईको साथमा दमौलीबाट पोखरातर्फ प्रस्थान गरेका छन् । उनी पोखराबाट हवाई मार्गमार्फत् काठमाडौं आउने बताइएको छ । पोखरा पुग्न साँझ भएको खण्डमा भने उनी मंगलबार मात्र काठमाडौं आउने दमौली पुगेका पत्रकार गोपिकृष्ण चापागाईंले जानकारी दिए ।

जेलमुक्त भएपछि उनी अत्यन्त खुसी देखिएका थिए । उनले आफ्नो समर्थकहरुलाई हात हल्लाउँदै धन्यवाद प्रकट गरे । उनलाई उच्च अदालत पोखराले सफाइ दिएकोमा पूजा शर्मादेखि रमेश उप्रेतीसम्मले सामाजिक सञ्जालमा खुसी व्यक्त गरेका छन् । २०७८ सालको फागुन १५ गतेदेखि जेल जीवन विताउन थालेका पल ठ्याक्कै एक वर्षमा सबै मुद्धाबाट सफाइ पाएर रिहाइ भएका हुन् ।

गत भदौ २१ गते नवलपुर जिल्ला अदालतले बाल यौन दुरुपयोगको मुद्दामा शाहलाई २ वर्ष ६ महिना जेल सजाय र १० लाख रुपैयाँ क्षतिपूर्ति भराउन आदेश दिएको थियो । त्यस फैसलाविरुद्ध शाहले उच्च अदालतमा पुनरावेदन दिएका थिए । उच्चका न्यायाधीश डिल्लीराज आचार्य र श्रीधरा कुमारी पुडासैनीको इजलासले नवलपुर अदालतको फैसला उल्ट्याउँदै शाहलाई सफाइ दिएको हो ।