बलिउड निर्देशक रोहित शेट्टी आफ्नो हिट फिल्म ‘सिंघम’को तेस्रो सिरिज निर्माणको तयारीमा छन् । अभिनेता अजय देवगनलाई नै पुनः मुख्य भूमिकामा अनुबन्ध गर्दै उनले ‘सिंघम अगेन’का लागि अभिनेत्री पनि छनोट गरेका छन् । यसपटक ‘सिंघम’ फ्रेन्चाइजमा नायिका दीपिका पादुकोणको इन्ट्री भएको छ । फिल्ममा दीपिका भित्रिएको जानकारी ट्रेड एनालिस्ट तरण आदर्शले दिएका छन् ।
‘सिंघम’का अघिल्ला दुवै श्रृंखलामा अजय मुख्य भूमिकामा थिए भने पहिलो पार्टमा काजल अग्रवाल र दोस्रो पार्टमा करीना कपूरको अभिनय थियो । तेस्रो सिरिजका लागि निर्देशक शेट्टीले दीपिकालाई चयन गरेका हुन् । फिल्ममा दीपिका महिला प्रहरी अफिसरको भूमिकामा हुने तरणले उल्लेख गरेका छन् । उनले यसअघि रोहितसँग सुपरहिट फिल्म ‘चेन्नई एक्सप्रेस’मा सहकार्य गरेकी थिइन् ।
सन् २०११ मा प्रदर्शित ‘सिंघम’ तमिल फिल्म ‘सिंघम’को हिन्दी रिमेक थियो भने सन् २०१४ मा आएको ‘सिंघम रिर्टन्स’ मलयालम फिल्म ‘एकलव्यन’बाट प्रभावित थियो । ‘सिंघम अगेन’को छायांकन आगामी अप्रिलमा हुनेछ । यो फिल्म पनि ‘सिंघम’का अघिल्ला शृंखलाजस्तै एक्सन प्रधान हुने भारतीय मिडियाले उल्लेख गरेका छन् । अजय पुनः एकपटक प्रहरीको अवतारमा प्रस्तुत हुनेछन् ।
