कोरोना महामारीभन्दा अगाडि मिलन चाम्सले भारतका हल र डिजिटल प्लेटफर्ममा रिलिज गर्ने योजनासहित आफू निर्देशित तथा निर्मित फिल्म ‘वीर विक्रम २’लाई हिन्दी भाषामा डबिङ गरेका थिए । तर, महामारीका कारण फिल्म रिलिज अन्योल बन्यो । अब यो फिल्म नेपालकै युट्युबमा रिलिज हुने भएको छ । फिल्म रिलिजभन्दा अगाडि सोमवार हिन्दी ट्रेलर सार्वजनिक गरिएको छ ।
फिल्मको नेपालीभन्दा हिन्दी ट्रेलर फरक बनाइएको छैन । हिन्दी डब त्यत्ति सशक्त पनि देखिन्न, जति ‘प्रेमगीत ३’ थियो । यद्यपि, हिन्दी ट्रेलरले फिल्मप्रति दर्शकमा उत्सुकता जगाउन भने सक्छ । मिलन चाम्सका अनुसार, डिसेम्बर १ (मंसिर १५) मा ओएसआर इन्टरनेशनलको युट्युब च्यानलमा फिल्मको हिन्दी डब रिलिज हुनेछ । यो फिल्मको नेपाली भर्सन भने यूट्युबमा आइसकेको छ ।
फिल्ममा पल शाह, वर्षा सिवाकोटी, नाजिर हुसेन, देशभक्त खनाल, विनिशा भण्डारी, विनोद सुवेदी खत्री, मनिष लिम्बुलगायतको अभिनय छ । सुदीप बरालको छायांकन, हिमाल केसीको द्वन्द्व र प्रदीप भारद्धाजको लेखन रहेको फिल्मको कार्यकारी निर्मातामा अर्पण सापकोटा र सह-निर्मातामा रञ्जिता सिवाकोटी छन् । दुई साथीको मित्रतामा आउने उतार-चढावमा फिल्म आधारित छ ।
‘वीर विक्रम २’ २०७६ सालको जेठ ३ गते नेपालका हलमा प्रदर्शन भएको थियो । यसको अघिल्लो श्रृंखला बक्सअफिसमा सफल भएकाले निर्देशक चाम्सले दोस्रो श्रृंखला निर्माण गरेका थिए । तर, कमजोर कथावस्तु र प्रस्तुतिकरणका कारण पहिलो पार्ट जस्तो न सफल हुन सक्यो न दर्शकले रुचाए । लकडाउनको समयमा चाम्सले ‘वीर विक्रम ३’को तयारी गरिरहेको चर्चा चलेको थियो ।
