हिन्दी भाषामा डब भएर पहिलो पटक नेपाली फिल्म ‘प्रेमगीत ३’ भारतीय हलमा प्रदर्शन हुने भएपछि नेपाली फिल्म क्षेत्रको सर्वोच्च निकाय चलचित्र विकास बोर्डले फिल्मको निर्देशकदेखि कलाकारसम्मलाई सम्मान गरेको छ । आइतवार बोर्डको सभा हलमा आयोजित एक कार्यक्रममा अध्यक्ष भुवन केसीले फिल्मको टिमलाई शुभकामना दिँदै सम्मानस्वरुप गौतम बुद्धको मुर्ति प्रदान गरे ।
.jpg)
नेपाली फिल्मलाई विश्व बजारमा पुर्याउन ‘प्रेमगीत ३’को टिमले गरेको प्रयासको मुक्तकण्ठले प्रशंसा गर्दै अध्यक्ष केसीले आफ्नो व्यक्तिगत र बोर्डको तर्फबाट फिल्मलाई हरेक प्रकारको साथ र सहयोग गर्न तयार रहेको प्रतिवद्धता जनाए । ‘म सधैं नै नेपाली फिल्म विश्व बजारमा पुग्नुपर्छ भन्ने सोच्थेँ । ‘प्रेमगीत ३’को टिमले यसको लागि प्रयास गरेकोमा म एकदमै खुसी छु,’ भुवनले भने ।
भारतमा हिन्दी भाषामा रिलिज हुन लागेको ‘प्रेमगीत ३’ले नेपाली कला, संस्कृति र भाषालाई विश्वमा चिनाउन ठूलो भूमिका खेल्नेमा उनी विश्वस्त छन् । फिल्मले नेपालको पर्यटन प्रवद्र्धनमा पनि धेरै सघाउने उनको भनाई छ । ‘प्रेमगीत ३’ले नेपाली फिल्मलाई अन्तर्राष्ट्रिय बजारमा पुग्न बाटो खोल्ने विश्वास व्यक्त गर्दै केसीले नेपाली र हिन्दी दुवै भाषाका लागि सफलताको शुभकामना दिए ।
बोर्डबाट सम्मान ग्रहण गरेपछि निर्देशक तथा निर्माता सन्तोष सेनले बोर्डको प्रोत्साहनले ठूलो हौसला मिलेको बताए । उनले नेपाली फिल्मलाई विश्व बजारमा पुर्याउन सिंगो फिल्म क्षेत्र एकजुट हुनुपर्ने धारणा राखे । कार्यक्रममा सेनसँगै कलाकारहरु सुनिल थापा, शिव श्रेष्ठ, मनिष राउतलगायत उपस्थित थिए । तर, मुख्य नायक प्रदीप खड्का र नायिका क्रिस्टिना गुरुङ भने गएका थिएनन् ।
बोर्डले ‘प्रेमगीत ३’को टिमलाई भारत प्रदर्शनका लागि शुभकामना तथा सम्मान कार्यक्रम गरिरहँदा काठमाडौंको याक एन्ड यति होटलमा अभिनेता प्रदीप खड्का बलिउड सुपरस्टार गोविन्दालाई फिल्मको हिन्दी टिजर देखाइरहेका थिए । एक रियालिटी शोमा अतिथीको रुपमा उपस्थित हुनका लागि नेपाल आएका गोविन्दासँग दिनेश डिसी र वरुण चौधरीले प्रदीपलाई भेट गराएका हुन् ।
भेटमा प्रदीपले ‘प्रेमगीत ३’ हिन्दी भाषामा डब भएको जानकारी दिँदै हिन्दी टिजर देखाएका थिए । टिजर हेरेपछि उनले भारतमा फिल्मको प्रचारमा सघाउने वाचा गरेको प्रदीपले इन्स्टाग्राममा उल्लेख गरेका छन् । उनले फिल्मको हिन्दी टिजरको पनि प्रशंसा गरेको जानकारी प्राप्त छ । ‘प्रेमगीत ३’ आगामी असोज ७ गते नेपाल र भारतमा एकसाथ प्रदर्शनमा आउने तयारीमा रहेको छ ।
