निर्माताहरुको छाता संस्था चलचित्र निर्माता संघको आसन्न महाधिवेशनमा निर्माता, निर्देशक तथा कलाकार नवल खड्काले अध्यक्ष पदमा उम्मेदवारी दिने भएका छन् । उनले आइतवार फेसबुकमा एजेन्डासहित अध्यक्षमा उम्मेदवारी घोषणा गरेका हुन् । उनले विदेश भूमिमा नेपाली फिल्म रिलिजको वातावरण बनाउनेदेखि विदेशी फिल्ममा कर वृद्धि गर्नेसम्मको एजेन्डा अघि सारेका छन् ।
.jpg)
निर्माता संघको लागि जग्गा खरिद गरेर भवन निर्माण गर्ने, विभिन्न राष्ट्रमा रहेका नेपाली दूतावास तथा नियोगहरूमा सांस्कृतिक सहचारी दूत नियुक्त गरी फिल्म प्रदर्शन गर्ने सहज बनाउने, चलचित्र विकास बोर्ड ७ वटै प्रदेशमा खोल्न पैरवी गर्ने, सबै प्रदेशमा स्टुडियो तथा चलचित्र प्रज्ञा प्रतिष्ठान स्थापना गर्न पहल गर्ने, ओटीटी प्लेटफर्मको खोजी गर्नेलगायतका एजेन्डाहरु खड्काको छ ।
आफू संघको सचिवमा रहँदा सामुहिकतालाई ध्यान दिइएर कार्य र निर्णयहरु गरिएको भए पनि समयक्रममा स्वच्छ प्रतिष्पर्धाका नाममा भद्दा चुनावी हर्कतका कारण संघ सामुहिकताबाट समूह–समूहमा विभाजित भएको तर अब संघको गतिलाई तीव्रता दिनुपर्ने उनको जोड छ । त्यसैले यसपटकको नेतृत्व सर्वसहमतिमा निर्माण गर्न आफ्नो पहल रहने पनि खड्काले उल्लेख गरेका छन् ।
नवलले लेखेका छन्, ‘हामीहरु पुराना तिक्तता विर्सेर सामुहिक पाइला चाल्न तयार भएका छौं । यसलाई निरन्तरता दिनु नै हाम्रो संघका लागि हित हुनेछ । हाम्रो एक जुटताले नै पेशालाई आत्मनिर्भर र प्रतिष्ठित बनाउन सहयोग पुग्नेछ । यो निचोड नै अहिले चलचित्र निर्माता संघका अगुवाहरुको हो ।’ अहिलेसम्म उनीबाहेक अरु कसैले संघको अध्यक्षमा उम्मेदवारी घोषणा गरेका छैनन् ।
