%20(1).jpg)
चलचित्र विकास बोर्डका अध्यक्ष भुवन केसीको नियुक्तिविरुद्ध नरेश कुमार पौडेलले प्रधानमन्त्री तथा मन्त्रिपरिषदको कार्यालयलाई विपक्षी बनाएर दायर गरेको रिट निवेदनमा सर्वोच्च अदालतले दुवै पक्षलाई छलफलका लागि बोलाएको छ । सोमबार न्यायाधीश प्रकाशमान सिंह राउतको एकल इजलासले रिट निवेदक र सरकार दुवै पक्षलाई भदौ २ गते छलफलका लागि बोलाएको हो ।
न्यायाधीश राउतद्वारा हस्ताक्षरित आदेशमा भनिएको छ, ‘अन्तरिम आदेश जारी गर्ने नगर्ने सम्बन्धमा दुवै पक्षलाई राखी छलफल गर्न उपयुक्त देखिँदा अन्तरिम आदेशको लागि मिति २०७९ भदौ २ गतेको पेसी तोकी सोको सूचना विपक्षीहरूलाई दिनू ।’ सर्वोच्च अदालतले केसीलाई बोर्ड अध्यक्षमा नियुक्ति गर्ने मन्त्रिपरिषद्को निर्णयको सक्कल फाइल झिकाउन समेत आदेश दिएको छ ।
अध्यक्ष पदमा आवेदन दिएकामध्ये नरेश कुमार पौडेलले भुवन केसीको शैक्षिक योग्यता नपुग्ने भन्दै मन्त्रिपरिषदको निर्णय बदरको माग गर्दै गत बिहीवार सर्वोच्च अदालतमा रिट निवेदन दिएका थिए । चलचित्र विकास बोर्डको अध्यक्ष बन्न रातारात कांग्रेस प्रवेश गरेका भुवनलाई साउन ९ गते बसेको मन्त्रिपरिषदको बैठकले २ वर्षका लागि बोर्डको अध्यक्षमा नियुक्त गर्ने निर्णय गरेको थियो ।
.jpg)
दयाराम दाहालको कार्यकाल सकिएपछि तालुकवाला निकाय सूचना तथा सञ्चार मन्त्रालयले विभिन्न मापदण्ड तोक्दै अध्यक्ष पदमा आवेदन दिन सूचना निकालेको थियो । अध्यक्ष बन्न भुवन केसीसहित अरुणकुमार प्रधान, दीपक श्रेष्ठ, मनिष पण्डित, सुचित्रा श्रेष्ठ, नरेशकुमार पौडेल, निर्मलराज ढकाल, सम्झना उप्रेती रौनियार, सुनीलकुमार पोखरेल र सुष्मा कार्कीले आवेदन दिएका थिए ।
