बलिउड अभिनेता मिथुन चक्रवर्तीले जब १९७६ मा फिल्म ‘मृग्या’बाट डेब्यू गरे, पहिलो फिल्मले नै उनलाई राष्ट्रिय अवार्ड दिलायो । सुपरहिट डेब्यू पाउनु हरेक कलाकारको भाग्यमा हुँदैन । मिथुनले भने पहिलो फिल्मपछि करिअर फर्केर हेर्नु परेन । तर, उनको फिल्म यात्रा त्यति सहज भने भएन । उनको जीवनमा कयौं उतार-चढाव आए । एकपटक उनले सुसाइड गर्नेसम्म सोचेका थिए ।
८० र ९० को दशकमा एकछत्र राज गरेका मिथुनले जीवनको उतार-चढावबारे भनेका छन्, ‘म खासै यस विषयमा कुरा नै गर्दिनँ । संघर्षको दिनको कुरा नगर्नु नै राम्रो हुन्छ किनकि यसले नयाँ कलाकारलाई हतोत्साहित बनाउन सक्छ । हरेक मान्छे संघर्षको दिनबाट गुज्रनु पर्छ तर मेरो संघर्ष अलि बढी थियो ।’ संघर्षदेखि थाकेर आफूले सुसाइड गर्ने सोच समेत बनाएको उनी बताउँछन् ।
‘कहिले काहिँ मलाई लाग्थ्यो कि म आफ्नो उद्देश्य पूरा गर्न सक्दिनँ । मैले सुसाइड गर्ने बारेमा पनि सोचेको थिएँ । केही कारणले म कोलकाता फर्किन सकिनँ,’ संघर्षपछि सफलता मिल्ने बताउँदै उनले अगाडि भने, ‘मेरो सल्लाह छ कि कहिल्यै पनि बिना संघर्ष आफ्नो जिन्दगी सिध्याउँछु भनेर नसोच्नु । म जन्मजात योद्धा हुँ । मलाई थाहा छैन कि कसरी हारिन्छ । अब हेर्नुहोस् म कहाँ छु ।’
मिथुन चक्रवर्तीको अभिनयको ‘द ताशकन्द फाइल्स’ र ‘द कश्मीर फाइल्स’ जस्ता फिल्ममा निकै प्रशंसा भएको थियो । उनले एक समय कयौं बंगाली फिल्ममा पनि काम गरेका छन् । अब उनी ‘प्रजापति’को मार्फत् फेरि बंगाली फिल्ममा पुनरागमन गर्दैछन् । तीन सयभन्दा बढी फिल्ममा काम गरिसकेका उनी आज पनि कुनै नयाँ फिल्मको सुटिङ हुँदा आफू नर्भस हुने गरेको बताउँछन् ।
