साउन २० गतेबाट प्रदर्शनमा आउन लागेको फिल्म ‘म’को टिमले प्रचारलाई प्रभावकारी बनाउन विभिन्न शैली अपनाएको छ । केही दिनअघि काठमाडौंको सडकमा हिँड्ने आम-मानिसलाई फिल्मको बारेमा जानकारी गराइएको थियो । प्रदर्शन मिति नजिकिँदै गर्दा दर्शकहरुको फिल्मप्रति ध्यान खिच्न काठमाडौंको चोक-चोकमा राखिएको डिजिटल स्क्रिनहरुमा ट्रेलर देखाउन सुरु गरिएको छ ।
काठमाडौंको चोकमा जाममा परेका आम-मानिसहरुलाई लक्षित गरेर डिजिटल स्क्रिनमार्फत् फिल्मको ट्रेलर देखाउन थालिएको निर्माता प्रकाश पुरीले जानकारी दिए । एकचोटी धेरै दर्शकसम्म पुग्नका लागि यो प्रचार शैली प्रभावकारी हुने उनको विश्वास छ । अहिले कलंकी, माईतीघर, कमलादी, दरबारमार्ग, चाबहिललगायतका चोकहरुमा रहेका स्क्रिनमा फिल्मको ट्रेलर बजिरहेको छ ।
निर्माता पुरीले भने- ‘काठमाडौंको मुख्य चोकहरुमा अहिले पनि दैनिक हजारौं यात्रुहरु जाममा पर्नुपर्ने बाध्यता कायमै छ । फिल्म हेर्न हलसम्म नजाने र युट्युबमा ट्रेलर नहेरेका सर्वसाधारणले पनि फिल्मको बारेमा थाहा पाउने यो शैली प्रभावकारी हुन्छ भन्ने लागेको छ । यदी यसले फिल्मको व्यापारमा फाइदा पुग्यो भने आगामी दिनमा अधिकांश नेपाली फिल्मले यो ट्रेन्ड पछ्याउनेछ ।’
फिल्म सम्बन्धि अध्ययन गराउने कान्तिपुर फिल्म एकेडेमीले निर्माण गरेको फिल्ममा सरोज खनाल, निशा अधिकारी, रुविना थापा, निराजन प्रधान, सविन श्रेष्ठ, नरेन खड्का, सरिता लामिछाने, पुनम श्रेष्ठ, संजोग रसाइली लगायतको अभिनय छ । सुवर्ण थापा निर्देशित फिल्ममा तेन्जिङ्ग पाल्देनको छायांकन र बनिश शाहको सम्पादन छ भने निर्मातामा बिमला हुमागाईं र पदम पुरी छन् ।
