सन् २००० मा आएको फिल्म ‘कहो ना प्यार है’बाट आफ्नो करिअरको सुरुवात गरेका अभिनेता ऋतिक रोशनले एकसेएक हिट र सम्झनलायक फिल्म दिइसकेका छन् । ‘कृष’, ‘जोधा अकबर’, ‘सुपर ३०’, ‘काबिल’, ‘धूम’, ‘वार’, ‘जिन्दगी ना मिलेगी दोबारा’ जस्ता फिल्मबाट आफूलाई अभिनयसँगै नृत्य र एक्सनमा पनि अब्बल प्रमाणित गरेका उनी बलिउडका महंगा अभिनेतामध्येमा पर्छन् ।
कोरोना महामारीअघि फिल्म ‘वार’मा देखिएका उनको यतिबेला चारवटा फिल्म पाइपलाइनमा छन् । ती चार फिल्मको बजेट मात्र ८ सय ७५ करोडभन्दा माथि रहने भारतीय मिडियाले उल्लेख गरेका छन् । हालै उनले फिल्म ‘विक्रम वेधा’को हिन्दी रिमेकको छायांकन सकाएका छन् । यो फिल्म १ सय ७५ करोडमा बनेको बताइएको छ । फिल्ममा सैफ अली खानको पनि अभिनय छ ।
ऋतिकको पाइपलाइनमा रहेको अर्को फिल्म हो, ‘फाइटर’ । यसमा उनी पहिलो पटक अभिनेत्री दीपिका पादुकोणसँग देखिँदैछन् । यसकारण यो फिल्म निर्माण हुनुभन्दा अगावैदेखि प्रतिक्षीत बनेको छ । सिद्धार्थ आनन्दको निर्देशनमा बन्ने फिल्मलाई भारतको पहिलो एरियल एक्सन फिल्म बताइएको छ । सुटिङको तयारीमा रहेको फिल्मको बजेट २ सय ५० करोड अनुमान गरिएको छ ।
त्यस्तै, तेस्रो फिल्म ‘वार २’ मा पनि ऋतिकले काम गर्दैछन् । सन् २०१९ मा आएको हिट फिल्म ‘वार’मा ऋतिक र टाइगर श्राफ एकसाथ देखिएका थिए । यसको सिक्वेलमा बजेट भने २ सय करोड आँकलन गरिएको छ । ऋतिक घरको फिल्म ‘कृष ४’मा पनि अभिनय गर्ने तयारीमा छन् । भिएफएक्सको अत्याधिक प्रयोग हुने फिल्मको बजेट २ सय ५० करोडभन्दा माथि हुने बताइएको छ ।
