साउथमा निर्देशक एसएस राजामौलीले ठूलो नाम बनाएका छन् । ‘बाहुबली’ सिरिजले उनलाई विश्वभर पहिचान दिलाएको थियो । उनको नाम मात्रै पनि फिल्म चल्नका लागि काफी मानिन्छ । उनको पछिल्लो फिल्म ‘आरआरआर’ले विश्वभर ११ सय करोडभन्दा बढी कमाई गरेको थियो । यतिबेला उनी तेलुगू सुपरस्टार महेश बाबूलाई लिएर एडभेन्चर-थ्रिलर फिल्म बनाउने तयारीमा छन् ।
यस्तैमा, राजामौलीले बलिउड सुन्दरी ऐश्वर्या रायलाई लिएर फिल्म बनाउन लागेको चर्चा चलेको छ । ‘आरआरआर’मा बलिउडबाट अजय देवगन र आलिया भट्टलाई अभिनय गराएका उनले नयाँ फिल्मका लागि ऐश्वर्यासँग छलफल गरेको भारतीय मिडियाको दाबी छ । तर, दुवैतर्फबाट यसबारेमा कुनै पनि जानकारी प्राप्त भएको छैन । ऐश्वर्या, राजामौलीसँग काम गर्न इच्छुक रहेको बताइन्छ ।
ऐश्वर्याले यसअघि कयौं साउथ फिल्ममा अभिनय गरिसकेकी छन् । उनले सुपरस्टार रजनीकान्तसँग अभिनय गरेको साउथ फिल्म ‘रोबोर्ट’ ब्लकबस्टर भएको थियो । केही समयदेखि अभिनयबाट टाढा रहेकी उनी चाँडै मणि रत्नमको फिल्म ‘पोन्नियिन सेलवन’मा देखिँदैछिन् । यसपछि उनी १२ वर्षपछि सुपरस्टार रजनीकान्तसँग साउथ फिल्म ‘थलाइवर १६९’मा अभिनय गर्ने तयारीमा छिन् ।
