समीक्षात्मक रुपमा अब्बल ठहरिएको फिल्म ‘सुनगाभा’ का निर्देशक सुवर्ण थापाले निर्देशन गरेको नयाँ फिल्म ‘द सिक्रेट अफ राधा’को प्रदर्शन मिति घोषणा गरिएको छ । मंगलवार निर्माण टिमले आगामी भदौ २४ गतेलाई प्रदर्शन मिति घोषणा गरेको हो । दोस्रो लकडाउनअघि पालुङ आसपासका क्षेत्रमा छायांकन भएको फिल्ममा सौगात मल्ल र सृष्टि श्रेष्ठ मुख्य भूमिकामा छन् ।
खगेन्द्र लामिछाने, मेनुका प्रधान, पशुपति राई, दिव्य देव पन्त, पुस्कर गुरुङ लगायतका कलाकारहरुको पनि अभिनय रहेको फिल्ममा दयाहाङ राई र निश्चल बस्नेतको विशेष भूमिका छ । फिल्मलाई निर्देशक थापासँग मिलेर सौगातले निर्माण गरेका हुन् । उनीहरुबीच अर्को फिल्ममा पनि सहकार्य हुँदैछ । यसअघि सौगातले फिल्म ‘फन्को’मा सुवर्णको निर्देशनमा काम गरेका थिए ।
आदियोगी भिजन, मन्डला अनलाइन, महारानी इन्टरटेन्मेन्ट र महा प्रोडक्सनको ब्यानरमा निर्मित यस फिल्ममा नरेन्द्र मैनालीको छायांकन र कालीप्रसाद बाँस्कोटाको संगीत छ । फिल्ममा सृष्टि टाइटल क्यारेक्टरमा छिन् । उनले यसअघि ‘माइकल अधिकारी, पोइ पर्यो काले, मासु भात’ लगायतका फिल्ममा सौगातसँग एकसाथ काम गरिसकेकी छन् । उनीहरु ‘रियल जोडी’ समेत हुन् ।
