.jpg)
नेपालमा छायांकन भएको साउथ (मलयालम) फिल्म ‘थिरिमाली’ को ट्रेलर सार्वजनिक भएको छ । २ मिनेट ४१ सेकेन्ड लम्बाईको ट्रेलरमा नेपाली अभिनेत्री स्वस्तिमा खड्का र कलाकार माओत्से गुरुङलाई देख्न सकिन्छ । ट्रेलरमा स्वस्तिमाको आइटम डान्स समावेश छ । फिल्ममा उनी एक आइटम गीतमा मात्र देखिनेछिन् भने माओत्सेको महत्त्वपूर्ण भूमिका रहेको जानकारी प्राप्त छ ।
राजीव शेठ्ठीको निर्देशनमा तयार भएको ‘थिरिमाली’ को नेपालमा पोखरा, काठमाडौं, लुक्ला लगायतका रमणीय स्थानमा छायांकन भएको थियो । ट्रेलरमा नेपालका दृश्यहरुलाई पर्याप्त ठाउँ दिइएको छ । कोरोना महामारीको समयमा नेपालमा छायांकन भएको फिल्मको नेपाल निर्माताको रुपमा सरोज न्यौपाने छन् । फिल्मले भारतबाट नेपाल घुम्न आएको तीन जना साथीको कथा भन्नेछ ।
हिन्दी, मलयालम, कन्नड, तमिल र तेलूगू भाषामा रिलिज हुने फिल्ममा भारतीय कलाकारहरु विविन जर्ज, जोनी एन्टिवनी, सलिम कुमार, इनोसेन्ट, सोहन सीनुलाल, हरीश कणरण, अन्ना राजनका साथै नेपाली कलाकार उमेश तामाङको पनि अभिनय छ । फिल्मलाई फजल अलीले खिचेका हुन् । एस के लरेन्स र रानी लरेन्स निर्माता रहेको फिल्मको प्रदर्शन मिति घोषणा गरिएको छैन ।
