चीनबाट विश्व भ्रमण गर्दै नेपाल भित्रिएको कोरोना भाइरसका कारण विगत सात महिनादेखि नेपाली फिल्म क्षेत्र ठप्प छ । सरकारले लकडाउन घोषणा गरेपछि देशभरका सिनेमा हलमा ताला लाग्यो । प्रदर्शनको तरखरमा रहेका फिल्म कम्प्यूटरको हार्ड डिक्समा थन्किए । छायांकनरत फिल्म अनिश्चितकालका लागि रोकिएका छन् । यो अवस्था अझै कहिलेसम्म रहन्छ, टुंगो छैन ।
निषेधाज्ञा खुकुलो गर्दै सरकारले विभिन्न क्षेत्रलाई सञ्चालनको अनुमति दिए पनि फिल्म क्षेत्रमा प्रतिबन्ध कायमै छ । फिल्मकर्मीहरुले निर्देशिका बनाएर फिल्म क्षेत्र खोल्न सरकारलाई आग्रह गरिरहेका छन् । तर, उनीहरुको आवाजले सिंहदरवार र बालुवाटार थर्किएको छैन । सरकारले फिल्म क्षेत्रलाई सञ्चालन अनुमति दिए थुप्रै फिल्मकर्मीहरु नयाँ फिल्म निर्माण गर्ने तयारीमा छन् ।
यस्तैमा, कोरोनाका कारण छायांकन रोकिएका दुई प्रतिक्षीत फिल्म ‘परदेशी २’ र ‘ए मेरो हजुर ४’ को छायांकन सुरु गर्ने तयारी थालिएको छ । यही शुक्रवारबाट निर्माता सुनिल कुमार थापाले अनमोल केसी स्टारर फिल्म ‘ए मेरो हजुर ४’ को बाँकी छायांकन सुरु गर्दैछन् । त्यस्तै, असोज दोस्रो साताबाट छायांकन थाल्ने गरी ‘परदेशी २’ टिमले मंगलवारबाट वर्कसप सुरु गरेको छ ।
निर्देशक नारायण रायमाझीले असोज १७/१८ गतेबाट छायांकन थाल्ने गरी वर्कसप सुरु गरेको जानकारी दिए । स्वास्थ्य सुरक्षा अपनाएर वर्कसप सुरु गरिएको उनले बताए । फिल्मको ७० प्रतिशत छायांकन पूरा भइसकेको र अब कथा परिवर्तन गरेर छायांकन गरिने उनको भनाई छ । उनका अनुसार, अहिलेको परिस्थितिलाई समेट्नका लागि कथामा धेरै परिवर्तन गरिएको छ ।
अब फिल्मको काठमाडौं, पाल्पा र विदेशमा छायांकन हुने निर्देशक रायमाझीले बताए । विदेशमा तत्काल सम्भव नभएकाले पहिला नेपालको छायांकन पूरा गर्ने उनको तयारी छ । रमेश विजीले लेखेको यस फिल्मलाई निर्देशक रायमाझी र राजेश वंशलले निर्माण गरेका हुन् । फिल्मलाई यसै वर्षको दशैंमा प्रदर्शनमा ल्याउने तयारीमा गरिएको थियो । तर, कोरोनाले यो सम्भव भएन ।
दीलिप रायमाझी, प्रशान्त तामाङ, प्रकाश सपूत, केकी अधिकारी, वर्षा सिवाकोटी, देबेन्द्र बब्लुलगायतका कलाकारको अभिनय रहने ‘परदेशी २’ मा विदेश पढ्न गएका विद्यार्थीको दुःख र त्यहाँको संघर्ष देखाइनेछ । गायक सपुतले यही फिल्मबाट अभिनेताको रुपमा डेब्यू गर्न लागेका हुन् । उनी आफ्नो बाल्यकालदेखिको फिल्मको हिरो बन्ने सपना पूरा हुन लागेकोमा खुसी देखिएका छन् ।
