कोरोना भाइरसका कारण विगत पाँच महिनायता फिल्म क्षेत्र पूर्ण रुपमा ठप्प छ । लकडाउनपछि रोकिएको फिल्म निर्माण र प्रदर्शन अहिलेबाट पुरानो अवस्थामा फर्किने हो, कुनै निश्चित छैन । देशभर बढिरहेको संक्रमितको संख्या हेर्दा दशैंअघि फिल्म क्षेत्र पुनः सञ्चालनमा आउने सम्भावना न्यून देखिन्छ । कोरोना महामारीपछि पनि फिल्म क्षेत्रलाई आफ्नो लयमा फर्किन सहज छैन ।
सामान्य अवस्थामा कलाकारहरु विरलै घरमा बस्न पाउँथे । फिल्म वा विभिन्न भिडियो सामाग्रीको छायांकनका कारण उनीहरुको दैनिकी घरबाहिरै वित्थ्यो । तर, कोरोनाको कहरसँगै हरेक एक कलाकार घरभित्र थुनिएका छन् । लकडाउन अन्त्य भएपछि केहीले म्यूजिक भिडियोमा काम गरे । गएको हप्ताबाट निषेधाज्ञा लागू भएपछि फेरि सबैको दैनिकी घरभित्रै वितिरहेको छ ।
(1).jpg)
फिल्ममा प्रायः नकारात्मक भूमिकामा देखिँदै आएका प्रमोद अग्रहरीले भने लकडाउनको समयमा एउटा फिल्मका लागि स्क्रिप्ट तयार पारेका छन् । पाँच महिनाको लकडाउनमा घरभित्रै बसेर आफूले फिल्मको स्क्रिप्ट फाइनल गरेको उनको भनाई छ । स्थिति सामान्य हुने वितिक्कै आफूले लेखेको स्क्रिप्टमा फिल्म निर्माण हुने उनले बताए । फिल्ममा उनी स्वयंको प्रमुख भूमिका रहनेछ ।
उनले भने- ‘कोरोनाको त्रासले गर्दा लकडाउनभरी कोठाभित्रै बसेँ । आफ्नो स्वास्थ्यलाई ख्याल गर्दै एउटा फिल्मका लागि स्क्रिप्ट लेखिसकेँ । हुनत, यसअघि नै स्क्रिप्टको खाका तयार पारेको थिएँ तर पर्याप्त समय दिन पाएको थिइनँ । लकडाउनमा स्क्रिप्टलाई मूर्तरुप दिने समय मिल्यो । मैले बाल्यकालदेखि समाजमा देख्दै र भोग्दै आएका चरित्रलाई स्क्रिप्टमा उतार्ने प्रयास गरेको छु ।’
फिल्ममा पाँच जना कलाकारको प्रमुख भूमिका रहने र त्यसमध्ये आफू एक रहेको उनी बताउँछन् । आफूले निर्वाह गर्ने चरित्रले दर्शकलाई आफ्नोपन महशुस गराउने उनको विश्वास छ । उनले फिल्मका लागि आफ्नो लुक्समा पनि परिवर्तन गर्दैछन् । फिल्ममा फाइनल भएका कलाकारलाई स्क्रिप्ट पठाइसकेका प्रमोदले केही आग्रजलाई स्क्रिप्ट अध्ययन गर्न दिने पनि सोच बनाएका छन् ।
