.jpg)
अभिनेता राजेश हमालले फिल्म प्राविधिकहरुको कोरोना बीमा गर्ने भएका छन् । उनले चलचित्र प्राविधिक संघमा आबद्ध ६ सय जना प्राविधिकको बीमा गर्न लागेका हुन् । उनले कोरोना बीमाका लागि प्राविधिकहरुको नामावली लिएर आउन आग्रह गरेको प्राविधिक संघका उपाध्यक्ष विनोद लामाले जानकारी दिए । यसका लागि केही दिनमा संघका पदाधिकारीहरुको बैठक बस्दैछ ।
सोमवार अभिनेता हमालले आर्थिक अवस्था कमजोर रहेका सय जना प्राविधिकलाई ५ हजारको दरले आर्थिक सहयोग गर्ने खबर बाहिर आएको थियो । यस विषयमा लामा भन्छन्, ‘निषेधाज्ञाभन्दा अगाडि राजेश दाईले सय जना प्राविधिकलाई आर्थिक सहयोग गर्ने प्रतिवद्धता जनाउनुभएको थियो । हामीले कोरोना बीमाका लागि आग्रह गरेपछि उहाँ यसमा पनि सहमत हुनुभयो ।’
उनका अनुसार, अभिनेता हमालले ६ सयको कोरोना बीमासँगै आर्थिक अवस्था कमजोर रहेका केही प्राविधिकलाई आर्थिक सहयोग गर्ने पनि वचन दिएका छन् । ‘राजेश दाईले अधिकांश प्राविधिकसँग काम गर्नुभएको छ । उहाँबाट प्राविधिकहरुले पनि ठूलो आश गरेका छन् । उहाँले सहयोग गर्ने प्रतिवद्धता व्यक्त गरेपछि प्राविधिकहरुको मुहारमा खुसी छाएको छ,’ उनले भने ।
केही दिनमा प्राविधिक संघको पदाधिकारीको बैठकबाट सर्वसम्मत रुपमा ६ सय जना प्राविधिकको नामावली कोरोना बीमाका लागि राजेश हमाललाई पठाउने उपाध्यक्ष लामाले बताए । कोरोनाका जारी लकडाउनले रोजीरोटी गुमेका प्राविधिकलाई कुनै प्रकारको सहयोग नगरेको भन्दै फिल्मकर्मीहरु हमालसँग असन्तुष्ट थिए । ‘महानायक’ विवाद जन्मनु यसैको उपज थियो ।
