कुनै बेला अक्षय कुमारलाई बलिउडमा ‘हिट मेशिन’को रुपमा चित्रित गरिन्थ्यो । किनकि, उनका एकपछि अर्को फिल्म सफल भइरहेका थिए । तर, अहिले अवस्था ठीक उल्टो छ । उनका फिल्मको असफलताको दर ह्वात्तै बढेको छ । गएको तीन वर्षमा उनका ९ वटा फिल्म फ्लप भए । समीक्षात्मक रूपमा अब्बल ठहरिएका ‘मिसन रानिगञ्ज’, ‘केशरी २’ जस्ता फिल्म समेत चलेनन् ।
लगातार फिल्म असफल भइरहे पनि अक्षयको व्यस्तता र माग घटेको छैन । वर्षमा ४/५ वटा फिल्म निरन्तर गरिरहेका छन् । कतिपयले यसैलाई उनका फिल्महरू असफल भइरहनुको कारण मान्ने गरेका छन् । उनलाई वर्षमा बढीमा दुईवटा फिल्ममा काम गर्न प्रशंसकहरुले नै सुझाव दिइरहेका हुन्छन् । तर, अक्षय भने वर्षमा ४/५ वटा फिल्म गर्न आफूलाई एकदमै मन पर्ने बताउँछन् ।
हालै एक अन्तर्वार्तामा उनले भनेका छन्, ‘मलाई यो मनपर्छ । मलाई अलग-अलग चरित्र निभाउन मज्जा लाग्छ । धेरैले मलाई ४ वटा फिल्म नगर्न सुझाव दिन्छन् । तर, म यस्तो नगर्नुपर्ने कुनै कारण नै देख्दिनँ । यदि काम मिलिरहेको छ भने म अवश्य गर्छु । फिल्म भनेको कुनै चल्छ, कुनै चल्दैन । म वर्षेनि ४/५ वटा फिल्म यसकारण गर्छु कि मलाई भिन्न-भिन्न भूमिका निभाउन मनपर्छ ।’
वर्षमा एउटा फिल्ममा काम गरे पनि त्यो हिट हुने कुनै ग्यारेन्टी नहुने उनको तर्क छ । यसैले काम गर्न छाड्न नहुने उनी बताउँछन् । ‘मलाई अमिताभ बच्चनले जबसम्म सम्भव हुन्छ, काम गर्न छाड्नु हुँदैन भनेर सल्लाह दिनुभएको थियो,’ अक्षय अगाडि भन्छन्, ‘मैले यही सिकेको छु कि ‘क्याल्कुलेसन’ र ‘म्यानिपुलेसन’ गलत हो । इमानदारितापूर्वक काम गर्दै आफ्नो लकमा विश्वास गर्नुपर्छ ।’
