सन् २०२३ मा आएको फिल्म ‘टाइगर ३’पछि अब बलिउड सुपरस्टार सलमान खान नयाँ फिल्म ‘सिकन्दर’मा देखिँदैछन् । ‘किक’ निर्माता साजिद नाडियाडवालाको निर्माणमा बन्न लागेको फिल्मलाई ए.आर. मुरुगदासले निर्देशन गर्दैछन् । उनले यसअघि ‘गजनी’ निर्देशन गरेका थिए । आगामी वर्ष अर्थात् सन् २०२५ को इदमा रिलिजको तयारी गरिएको फिल्ममा अब मुख्य अभिनेत्रीको पनि टुंगो लागेको छ ।
‘सिकन्दर’मा सलमानसँग अभिनेत्री रश्मिका मन्दानाको जोडी बाँधिने भएको छ । निर्माण कम्पनी नाडियाडवाला ग्रान्डसन इन्टरटेनमेन्टले बिहीबार एक वक्तव्य जारी गर्दै फिल्ममा रश्मिकाको प्रवेशबारे पुष्टि गरेको हो । उनले पहिलोपटक सलमानसँग काम गर्न लागेकी हुन् । उनले ‘सिकन्दर’को हिस्सा बन्न पाउँदा गर्व महसुस भएको सामाजिक सञ्जालमा उल्लेख गरेकी छन् ।
‘पुष्पा’ र ‘एनिमल’को सफलतापछि रश्मिकाको बलिउड र साउथ फिल्ममा उच्च माग छ । ‘गुडबाय’बाट बलिउडमा डेब्यु गरेकी उनको ‘पुष्पा २’ रिलिजको तयारीमा छ । तेलुगू फिल्म ‘डियर कमरेड’पछि भारतमा ‘नेशनल क्रस’को रुपमा चिनिएकी रश्मिका ‘सिकन्दर’मा भित्रिएपछि दर्शकमा फिल्मको पखाई बढेको छ । एक्सन प्रधान रहने यो फिल्मको छायांकन सुरु भइसकेको छ ।
