एजेन्सी, मुम्बई, २०६६ फाल्गुन २२, शनिवार
बलिउडमा यो साता एकै पटक पाँचवटा नयाँ चलचित्र प्रदर्शन हुँदैछन् । शुक्रबारदेखि प्रदर्शनमा आएका यी चलचित्रमध्ये हास्यप्रधान चलचित्र 'अतिथि तुम कब जाओगे ?' दर्शकले रुचाउने सम्भावना छ ।
अमिता पाठकले निर्माण गरेको यो चलचित्रको निर्देशन अश्विनी धीरले गरेका हुन् । राष्ट्रिय पुरस्कारप्राप्त कलाकारहरू अजय देवगण, कोंकणा सेन शर्मा तथा परेश रावलले यो चलचित्रमा मुख्य भूमिका निर्वाह गरेका छन् । चलचित्रका अभिनेता अजय देवगणका अनुसार यो चलचित्रमा सन् ७०-८० को दशकमा निर्माण भएका हास्यप्रधान चलचित्रको झझल्को पाउन सकिन्छ ।
चलचित्रको पटकथालाई नै पुराना हिन्दी चलचित्रको स्वरूप प्रदान गरिएको छ । चलचित्रमा परिस्थितिअनुरूपको हास्यदृश्य समावेश छ । चलचित्रको कथा अनुसार पुनीत -अजय देवगण) तथा मुनमुन -कोंकणा सेन शर्मा) विवाहित जोडी हुन् । उनीहरू मुम्बईमा सुखद जीवन बाँचिरहेका छन् । उनीहरूको जीवनमा त्यसबेला भुइँचालो जान्छ जब उनीहरूका टाढाका नातेदार चाचाजी -परेश रावल) उनीहरूको घरमा पूर्वजानकारी बिना नै आइपुग्छन् । गाउँमा बसोबास गर्ने चाचाजी शहरी रहनसहनका सम्बन्धमा जानकार हुँदैनन् । पाहुना कम दिनका लागि मात्र राम्रा लाग्छन्, तर यी पाहुना त्यस्ता छन् जो गाउँ र्फकने नाम लिँदैनन् । उनलाई आफ्नो घरबाट निकाल्न पुनीत र मुनमुनले धेरै उपाय अपनाउँछन् जसबाट थुप्रै प्रकारका हास्यास्पद परिस्थिति सिर्जना हुन्छन् । |
