फिल्मीखबर, काठमाण्डौ, २०६६ माघ २५, सोमवार
नायिकाको स्लिमबडीको चर्चा हुन थालेपछि अभिनेत्री सौजन्य सुब्बा पनि स्लिम हुने अभियानमा छिन् । 'स्लिम हिरोइनको चर्चा बढी हुन थाल्यो त्यही भएर मैले पनि दुब्लाउने शैली अपनाएकी छु ।' मुस्कुराउँदै भनिन् सौजन्यले ।
डेढ वर्षभयो उनले व्यायामशाला धाउन थालेको । तर, अझै सोचे जस्तो हुन सकेकी छैनन् । सुटिङले व्यायामलाई नियमितता दिन नसकेको धारणा राख्ने सौजन्यले डेढ वर्षा पाँच किलो वजन घटाइछन् । उनी भन्दै थिइन् 'अहिले त ५० किलोमा झरेकी छु अब ४८ बनाउँछु ।' नायिकाको ज्यान लोभलाग्दो बनाउनलाई स्लिम भएर मात्रै पनि पुग्दो रहेनछ । 'जिरो साइज' को कुरा गरिन् । पाँच किलो वजन घटाए पनि केही महिना व्यायामशाला धाउन छाडेकी सौजन्यले फेरि सुरु गरेकी छिन् । अबको उनको योजना छ 'जिरो साइज' बनाउने ।
'जिरो साइज' बनाउन सौजन्यले खानामा पनि केही कम गरेकी छिन् । 'मलाई त भात सार्है मीठो लाग्थ्यो तर, अहिले रोटी खान थालेको छु ।' सौजन्यले भनिन् । मासुबिना खाना नरुच्ने सौजन्यलाई यसको मात्रा पनि घटाउनु परेको छ । मासुका प्राय परिकार मन पराउने सौजन्यले चिकेनका 'आइटम' खान थालेको बताइन् । 'मीठो लाग्यो भन्दैमा खान नपाइँदो रहेछ, अहिले त मन पर्ने धेरै परिकार कटौती गरेकी छु ।' उनले भनिन् । |
