१४ वर्ष अगाडी सडक नाटकमा अभिनय गरेर सिनेमासम्म आईपुगेकी अभिनेत्री प्रज्ञा जोशी एक सफल अभिनेत्री र निर्मात्री हुन् । देवी, चेतना, चाहना मनको, दुइ दिनको जिन्दगानी, करुणा, सिंदूरजस्ता टेलिचलचित्रमा अभिनय गरिसकेकी प्रज्ञाले पहिलो पटक सिंदूर नामक टेलीचलचित्र निर्माण गरिन् र त्यसबाट सफलता कमाए पछि उनले सपूत नामक चलचित्र निर्माण गरिन् । सपूतले पनि उनलाई राम्रै सफलता दिलायो ।

सपूतको सफलता सँगै उनले पछिल्लो पटक सम्झना नामक चलचित्र निर्माण गरिन् जसलाई फागुन महिनामा उपत्यका र उपत्यका बाहिरका हलहरूमा एकसाथ प्रदर्शनमा ल्याउने तयारी गरिरहेकी छिन् । योगेश घिमिरेको निर्देशनमा बनेको चलचित्र 'सम्झना' भावनात्मक प्रेमकथामा आधारित छ ।

जीवनमा माया कसैको लागी प्राप्ति मात्र नभएर सम्झना पनि हुन सक्छ भन्ने मुख्य कथाबस्तु बोकेको यस चलचित्रमा कुनै पनि समयमा कुनै पनि उमेर समूह बिच प्रेम गर्न सकिने कुरालाई देखाउने खोजिएको निर्देशकले बताए । भावना, बलिदन, प्रप्ति र त्यागको समिश्रण रहेको यस चलचित्रमा निखिल उप्रेती, राजबल्लभ कोईराला, सञ्चिता लुईटेल, गरिमा पन्त, सुवास मेचेको मुख्य अभिनय रहेको छ ।