बोल्नै नसक्ने एउटी केटीको प्रेमकथालाई मुख्य बिषय बनाएर निर्माण गरिएको नेपाली चलचित्र 'तिमी मात्र तिमी' प्रदर्शनको तयारीमा रहेको छ । चलचित्रको प्रमुख पात्र नायिका झरना थापाले चलचित्र भरि नै एक शब्द पनि नबोली साँकेतिक भाषा प्रयोग गरेकी छिन् । उनको साँकेतिक भाषालाई 'सबटाईटल' पनि नदिएको निर्देशक योगेश घिमिरेले फिल्मीखबर डटकमलाई  बताए ।

'झरनाले साँकेतिक भाषा मार्फत नै आफ्ना भावनाहरू पोख्ने छिन्', निर्देशक घिमिरेले बताए । प्रमुख पात्र नै बोल्न नसक्ने भुमिकामा प्रस्तुत हुनु यस चलचित्रको एउटा आकर्षण हो । करिब ६ जना कलाकारको मुख्य अभिनय रहेको यो चलचित्र नयाँ बर्षको आगमनसँगै दर्शक माझ आउने चलचित्रका निर्माता निरज ढकालले बताए । नायिका झरना थापाले आफूले पहिलो पटक निकै मेहनत गरेर यस्तो भुमिका गरेको हुनाले चलचित्र हेर्न निकै उत्साहित भएको र यस चलचित्रबाट निकै आशाबादी भएको बताईन् ।
 

 प्राय: निर्माता निर्देशकहरूले आफ्नो चलचित्रलाई त्रिकोणात्मक प्रेम कथामा आधारित चलचित्र भन्ने गर्छन् तर चलचित्र 'तिमी मात्र तिमी' का निर्माता तथा निर्देशकले यस चलचित्रलाई 'स्क्वाएर लभस्टोरी' भनेका छन् । एन आर फिल्मसको प्रस्तुती रहेको यस चलचित्रमा झरनाको साथमा राजबल्लभ कोईराला, नन्दिता केसी, मुकेश आचार्य, प्रज्ञा जोशीको मुख्य अभिनय रहने छ । कृष्ण आचार्यको कथा, पटकथा र संवाद रहेको यस चलचित्रमा नव संगीतकार ताराप्रकाश लिम्बुको संगीत रहने छ भने चलचित्रको छायाँकन युवराज राईले गरेका हुन् ।

स्मरण रहोस, यस चलचित्रको दुईवटा संवादमा सेन्सर बोर्डले सेन्सर गरेको हुनाले उक्त संवादलाई 'म्युट' गरिएको छ । चलचित्रमा समाबेश भएको 'एउटी मामुली आइमाईको हातबाट इन्स्पेक्टरको हत्या भयो' र 'पुलिसको बदमासीको बारेमा तँलाई थाहा छैन'  भन्ने संवादलाई सेन्सर बोर्डले सेन्सर लगाएको छ । चलचित्रमा पुलिस प्रशासनप्रति नकारात्मक अर्थ लगाउने गरि यस्तो संवाद प्रयोग गरिएकोले सेन्सर लगाएको सेन्सर बोर्डको भनाई रहेको छ ।