२०४९ सालमा नेपाली रजतपटमा पाईला टेकेर अहिलेसम्म अपराध, धर्म, चुनौती, हिरो, कस्तो साईनो, यस्तै रहेछ जीन्दगी, धड्कन र अभिमन्यू जस्ता चलचित्र निर्माण गरीसकेका निर्देशक तथा निर्माता नरेश पौड्यालले पछिल्लो पटक निर्माण गरेको चलचित्र 'दिपशिखा' प्रदर्शनको तयारीमा रहेको छ । बिशुद्व प्रेमकथामा आधारित यस चलचित्रको कथा नायिका अरूणिमा लम्सालको रहेको छ ।

चेतन सापकोटाको संगित, एन बि महर्जनको द्वन्द, शान्ता नेपाली र बसन्त श्रेष्ठको नृत्य र नरेश पौड्याल र प्रमोद ढुङ्गानाको गीत रहेको छ । चलचित्रमा जीवन लुईटेल, अरूणिमा लम्साल, निरज बराल, मुकुन्द थापा, राधा लम्साल, ममता प्रधान, बिष्णु सापकोटा र राजकुमार थापाको मुख्य अभिनय रहेको छ । नेपाली रजतपटमा आफ्नो छुट्टै पहिचान बनाउन सफल निर्देशक नरेशको चलचित्र 'दिपशिखा' मा पहिलो पटक नायिका अरूणिमा लम्साल र उनकै आमा राधा लम्साल आमा छोरीकै भुमिकामा देखिदै छन् ।

यसैगरी यस चलचित्रमा सन् २००७ को ईन्डियन आईडलमा फस्ट रनरअप भएका गायक अमित पलले २ वटा गीत गाएका छन् । चलचित्रमा अभिनय गरेका नायक द्वय जीवन लुईटेल र निरज बराल क्रमश: मि. नेपाल र मि. युनिभर्सिटी भई नेपाली रजतपटमा पाईला चालेका आशा लाग्दा कलाकार हुन् ।

चलचित्रमा दर्शकहरूलाई थप मनोरञ्जन दिनको लागि १४ जना चलेका कलाकारलाई सानो भुमिकामा भएपनि प्रस्तुत गराएको निर्देशक नरेशले फिल्मीखबर डटकमलाई जानकारी दिए । निर्देशक नरेश भन्छन् - 'मेरो चलचित्रले पहिलो दिनमा नै एक लाखको व्यापार गर्‍यो भने सम्झनुस् चलचित्र सुपरहिट हुनेछ ।'

स्मरण रहोस यस चलचित्रको छायाँकनको अन्तिम दिन अन्तिम दृश्यको अन्तिम सट दिने क्रममा नायक जीवन लुईटेलको देब्रे हातको पातोको गेडी खुस्किएको थियो ।